సుప్రీం జోక్యంతో పురపోరుకు బ్రేక్! 27 తర్వాత విచారణ

సూర్య బ్యూరో, ఉమ్మడి గోదావరి జిల్లాలు: రాష్ట్రంలో మున్సిపల్‌ ఎన్నికల ప్రక్రియ సుప్రీంకోర్టు జోక్యంతో అనూహ్య మలుపు తిరిగింది. నామినేషన్ల సమయంలో తమ అభ్యర్థులను అడ్డుకున్నారంటూ వైఎస్సార్‌ కాంగ్రెస్‌ పార్టీ అత్యున్నత న్యాయస్థానాన్ని ఆశ్రయించడంతో రాష్ట్ర ఎన్నికల సంఘం 100 పట్టణ స్థానిక సంస్థల్లో తదుపరి ఎన్నికల ప్రక్రియను తాత్కాలికంగా నిలిపివేసింది. తొలుత 19 స్థానాలకే పరిమితం చేయాలని భావించినప్పటికీ, అనంతరం 13 కార్పొరేషన్లు, 87 మున్సిపాలిటీలు, నగర పంచాయతీలకు ఈ నిర్ణయాన్ని వర్తింపజేసింది. అక్టోబరు 28న పోలింగ్‌ నిర్వహించాల్సి ఉండగా తాజా పరిణామాలతో ఎన్నికల షెడ్యూల్‌పై అనిశ్చితి నెలకొంది.

సుప్రీంకోర్టులో వాదనలు ఇలా..

వైఎస్సార్‌ కాంగ్రెస్‌ పార్టీ ప్రధాన కార్యదర్శి లేళ్ల అప్పిరెడ్డి తరఫున సుప్రీంకోర్టులో ప్రత్యేక అనుమతి పిటిషన్‌ దాఖలైంది. ఎస్‌ఎల్‌పీ (సివిల్‌) నంబరు 37476/2026గా పేర్కొన్న ఈ కేసును అక్టోబరు 21న జస్టిస్‌ జోయ్‌మాల్య బాగ్చి, జస్టిస్‌ వి.మోహన ధర్మాసనం విచారించింది. వైసీపీ తరఫున సీనియర్‌ న్యాయవాది మణీందర్‌ సింగ్‌, ఎన్నికల సంఘం తరఫున కె.పరమేశ్వర్‌, ప్రభుత్వం తరఫున సిద్ధార్థ్‌ లూథ్రా, ముకుల్‌ రోహత్గీ వాదనలు వినిపించినట్లు సమాచారం. పలు ప్రాంతాల్లో అభ్యర్థులను బెదిరించి నామినేషన్లు వేయకుండా అడ్డుకున్నారని వైసీపీ ఆరోపించగా, ప్రభుత్వం ఆ ఆరోపణలను వ్యతిరేకించింది. ఇరుపక్షాల వాదనలు పరిశీలించిన ధర్మాసనం ఫిర్యాదులపై ఎన్నికల సంఘమే నిర్ణయం తీసుకోవాలని ఆదేశించింది. అవసరమైనచోట నామినేషన్లకు మరో 48 గంటల అవకాశం కల్పించాలని, అభ్యర్థుల తుది జాబితా ప్రకటనను అక్టోబరు 25 వరకు వాయిదా వేయాలని సూచించింది. తదుపరి విచారణను అక్టోబరు 27కు వాయిదా వేసింది.

తీర్పు తర్వాత పరిస్థితి ఏమిటి?

సుప్రీంకోర్టు మధ్యంతర ఆదేశాలతో రాష్ట్రంలో పురపాలక ఎన్నికల నిర్వహణపై అనిశ్చితి ఏర్పడింది. నామినేషన్ల గడువు పొడిగించాల్సిన ప్రాంతాలను గుర్తించేందుకు కలెక్టర్లు, ఎస్పీల నివేదికలు కీలకంగా మారాయి. ఫిర్యాదులు నిజమని తేలినచోట అభ్యర్థులకు మరో అవకాశం కల్పించాల్సి రావచ్చు. దీంతో అక్టోబరు 28న పోలింగ్‌ నిర్వహించడం సాధ్యమవుతుందా అన్న సందేహాలు వ్యక్తమవుతున్నాయి. నామినేషన్ల గడువు పొడిగిస్తే ఎన్నికల షెడ్యూల్‌లో మార్పులు అనివార్యమయ్యే పరిస్థితి కనిపిస్తోంది. మరోవైపు ఉమ్మడి గోదావరి జిల్లాల్లో ఎన్నికలు పెండింగ్‌లో ఉన్న కాకినాడ, రాజమహేంద్రవరం కార్పొరేషన్ల పరిస్థితి వేరు కావడంతో వాటిపై తాజా ఆదేశాల ప్రభావాన్ని ప్రత్యేకంగా పరిశీలించాల్సి ఉంది. అక్టోబరు 27న ఎన్నికల సంఘం నివేదికలను సుప్రీంకోర్టు పరిశీలించిన తర్వాతే పురపోరు తదుపరి దశపై మరింత స్పష్టత వచ్చే అవకాశం ఉంది.