చైనా అక్రమ కార్యకలాపాలపై తైవాన్ ప్రత్యేక దర్యాప్తు
సూర్య అంతర్జాతీయ డెస్క్: స్వయంప్రతిపత్తి కలిగిన తైవాన్ దీవిని తమ భూభాగంగా ప్రకటించుకునేందుకు డ్రాగన్ దేశం నిరంతరం వివిధ రకాల కుయుత్రాలకు పాల్పడుతోంది. పొరుగు దేశం నుంచి వస్తున్న వ్యూహాత్మక బెదిరింపులను అడ్డుకునేందుకు తైవాన్ రక్షణ రంగం కఠిన చర్యలు చేపట్టింది. ముఖ్యంగా రాజకీయ వ్యతిరేకులను, ప్రభుత్వాన్ని విమర్శించే వారిని లక్ష్యంగా చేసుకుని సరిహద్దులు దాటి వేధించే చర్యలకు పాల్పడుతున్నట్లు తైవాన్ ప్రభుత్వం తీవ్ర ఆందోళన వ్యక్తం చేసింది. ఈ తరహా దుశ్చర్యలకు పాల్పడే క్రమంలో విదేశీ శక్తులు స్థానిక ప్రైవేట్ డిటెక్టివ్ ఏజెన్సీలు మరియు అసాధారణ కార్యకలాపాలకు పాల్పడే ముఠాలను ఆశ్రయిస్తున్నట్లు గుర్తించారు.
ఇటీవల కాలంలో చైనా నేతలను విమర్శించిన ఒక ప్రముఖ హాస్యనటుడిపై జరిగిన దాడి వెనుక కూడా ఈ తరహా స్థానిక క్రిమినల్ నెట్‌వర్క్‌ల హస్తం ఉన్నట్లు దర్యాప్తులో వెల్లడైంది. చైనా ప్రభుత్వ ప్రయోజనాల కోసం పనిచేస్తున్న కొందరు వ్యక్తులు తైవాన్ పౌరులను భయభ్రాంతులకు గురిచేయడానికి రకరకాల పద్ధతులను అనుసరిస్తున్నారని అధికారులు తెలిపారు. రాజకీయంగా అనుమానితులుగా భావించే వారిపై నిఘా వేయడం, వారి వ్యక్తిగత సమాచారాన్ని సేకరించడం వంటి వాటికి స్థానిక క్రిమినల్ గ్యాంగ్‌లను వాడుకుంటున్నట్లు ప్రాథమిక సమాచారం అందినట్లు భద్రతా వర్గాలు వెల్లడించాయి.
ఈ విద్రోహ చర్యలను అడ్డుకునేందుకు తైవాన్ నేషనల్ సెక్యూరిటీ బ్యూరో డైరెక్టర్ జనరల్ త్సాయ్ మింగ్-యెన్ పార్లమెంట్ వేదికగా కీలక ప్రకటన చేశారు. చైనా చేస్తున్న ఈ అక్రమ కార్యకలాపాలను ఎట్టి పరిస్థితుల్లోనూ ఉపేక్షించేది లేదని ఆయన స్పష్టం చేశారు. దేశ భద్రతకు ముప్పు వాటిల్లేలా వ్యవహరించే స్థానిక ముఠాల ఆటకట్టిస్తామని, నిందితులను కఠినంగా శిక్షించేందుకు చట్టపరమైన చర్యలు ముమ్మరం చేసినట్లు ఆయన తెలిపారు. విదేశీ ప్రయోజనాల కోసం దేశం లోపల ఉండి కుట్రలు పన్నే వారిపై కఠినమైన నిఘా ఉంచామని భద్రతా బలగాలు హెచ్చరించాయి.
ఈ కఠిన చర్యలలో భాగంగా తైవాన్ క్రిమినల్ ఇన్వెస్టిగేషన్ బ్యూరో కూడా రంగంలోకి దిగింది. విదేశీ శక్తుల కోసం నిఘా, దాడులు లేదా బెదిరింపులకు పాల్పడే స్థానిక సహకారులపై మరింత తీవ్రమైన పోలీసు చర్యలు ఉంటాయని స్పష్టం చేసింది. నేరాలకు నిధులు సమకూర్చే వారిని, వెనుక ఉండి నడిపించే సూత్రధారులను గుర్తించేందుకు డిజిటల్ లావాదేవీలను నిశితంగా పరిశీలిస్తున్నట్లు తెలిపారు. ప్రజాస్వామ్య విలువలకు భంగం కలిగించేలా సాగే ఏ ఒక్క కుట్రను కూడా క్షమించేది లేదని, దేశ ప్రజల రక్షణే తమ ప్రధాన ధ్యేయమని తైవాన్ యంత్రాంగం తేల్చిచెప్పింది.
