కళ్యాణదుర్గం మున్సిపాలిటీలో వైసీపీకి మరో ఎదురుదెబ్బ టీడీపీలో చేరిన 8 కుటుంబాలు.. మద్దతు తెలిపిన మరో 40 కుటుంబాలు ఎమ్మెల్యే అమిలినేని సురేంద్రబాబు సమక్షంలో పార్టీలో చేరికలు

కళ్యాణదుర్గం ఇన్చార్జ్ (కళ్యాణదుర్గం ఇన్చార్జ్, మేజర్ న్యూస్) : మున్సిపల్ ఎన్నికల వేళ కళ్యాణదుర్గం పట్టణంలో వైఎస్సార్ కాంగ్రెస్ పార్టీకి మరో ఎదురుదెబ్బ తగిలింది. పట్టణంలోని 27, 28వ వార్డులకు చెందిన కుమ్మర సామాజిక వర్గానికి చెందిన ఎనిమిది కుటుంబాలు వైసీపీని వీడి తెలుగుదేశం పార్టీలో చేరగా, మరో 40 కుటుంబాలు టీడీపీకి మద్దతు ప్రకటించాయి.

స్థానిక కౌన్సిలర్ అభ్యర్థులు పూల వెంకటేషులు, గెల్లి వెంకట కార్తిక్, మాజీ మున్సిపల్ వైస్ చైర్మన్ జయం ఫణి ఆధ్వర్యంలో ఈ చేరికలు జరిగాయి. కళ్యాణదుర్గంలోని ప్రజావేదిక వద్ద ఎమ్మెల్యే అమిలినేని సురేంద్రబాబు సమక్షంలో కుమ్మర సామాజిక వర్గానికి చెందిన తిప్పేస్వామి, తిమ్మరాజు, గురుస్వామి, నంద, కే. సిద్దు, సిద్దరాములు, వెంకటేషులు తదితరులు టీడీపీ కండువాలు కప్పుకుని పార్టీలో చేరారు.

ఈ సందర్భంగా మరో 40 కుటుంబాలు సైతం తెలుగుదేశం పార్టీకి తమ మద్దతు ప్రకటించాయి. రానున్న మున్సిపల్ ఎన్నికల్లో టీడీపీ అభ్యర్థుల గెలుపు కోసం కృషి చేస్తామని వారు వెల్లడించినట్లు పార్టీ వర్గాలు తెలిపాయి.కళ్యాణదుర్గం మున్సిపాలిటీలో రోజురోజుకూ వైసీపీని వీడి టీడీపీలో చేరుతున్న వారి సంఖ్య పెరుగుతోందని కూటమి నాయకులు పేర్కొన్నారు. తాజా చేరికలు 27, 28వ వార్డుల్లో పార్టీ అభ్యర్థులకు మరింత బలాన్ని చేకూరుస్తాయని వారు ఆశాభావం వ్యక్తం చేశారు. ఎన్నికల సమయంలో చోటుచేసుకుంటున్న ఈ పరిణామాలు స్థానిక రాజకీయాల్లో ప్రాధాన్యత సంతరించుకున్నాయి.