భవాని భక్తులపై దూసుకెళ్లిన స్కార్పియో! మంత్రి రాంప్రసాద్ దిగ్ర్భాంతి

భవానీ భక్తులపైకి దూసుకెళ్లిన స్కార్పియో.. నలుగురు దుర్మరణం!

మరో ఇద్దరికి తీవ్ర గాయాలు.. కత్తిపూడి వద్ద ఘోర రోడ్డు ప్రమాదం

ప్రమాదంపై రవాణా శాఖ మంత్రి రాంప్రసాద్ రెడ్డి దిగ్భ్రాంతి

సూర్య బ్యూరో, ఉమ్మడి గోదావరి జిల్లాలు:

కాకినాడ జిల్లాలో ఘోర రోడ్డు ప్రమాదం చోటుచేసుకుంది. కత్తిపూడి సమీపంలోని రావికంపాడు జంక్షన్ వద్ద భవానీ భక్తులపైకి స్కార్పియో వాహనం దూసుకెళ్లడంతో నలుగురు అక్కడికక్కడే మృతి చెందారు. మరో ఇద్దరు తీవ్రంగా గాయపడ్డారు. విజయనగరం జిల్లా డెంకాడ నుంచి విజయవాడ కనకదుర్గమ్మ దర్శనానికి బయలుదేరిన భక్తులు ఈ ప్రమాదానికి గురయ్యారు.

అందిన సమాచారం ప్రకారం.. డెంకాడకు చెందిన భవానీ భక్తులు ప్రైవేటు బస్సులో విజయవాడకు ప్రయాణమయ్యారు. మార్గమధ్యలో కత్తిపూడి సమీపంలో బస్సు మరమ్మతులకు గురైంది. దీంతో కొందరు భక్తులు టీ తాగేందుకు రోడ్డు పక్కన నడుచుకుంటూ వెళ్తుండగా స్కార్పియో వాహనం వారిపైకి దూసుకెళ్లింది. ఈ ప్రమాదంలో నలుగురు ప్రాణాలు కోల్పోగా, మరో ఇద్దరు తీవ్రంగా గాయపడ్డారు. అమ్మవారి దర్శనానికి వెళ్తున్న భక్తులు మృత్యువాత పడటంతో తీవ్ర విషాదం నెలకొంది.

మంత్రి రాంప్రసాద్ రెడ్డి దిగ్భ్రాంతి

కత్తిపూడి వద్ద జరిగిన ఘోర రోడ్డు ప్రమాదంపై రాష్ట్ర రవాణా శాఖ మంత్రి మండిపల్లి రాంప్రసాద్ రెడ్డి తీవ్ర దిగ్భ్రాంతి వ్యక్తం చేశారు. ప్రమాద ఘటనపై రవాణా శాఖ అధికారులతో ఫోన్‌లో మాట్లాడి వివరాలు తెలుసుకున్నారు. నలుగురు భవానీ భక్తులు మృతి చెందడం అత్యంత బాధాకరమని పేర్కొన్నారు. మృతుల కుటుంబ సభ్యులకు ప్రగాఢ సానుభూతి తెలిపారు. ప్రమాదంలో గాయపడిన వారికి మెరుగైన వైద్య చికిత్స అందించాలని, అత్యవసర వైద్య సేవలు కల్పించాలని సంబంధిత అధికారులను కోరారు. మృతుల కుటుంబాలకు ఈ విషాదాన్ని తట్టుకునే మనోధైర్యాన్ని కనకదుర్గమ్మ ప్రసాదించాలని ఆకాంక్షించారు.