స్థానిక పోరుకు కూటమి ‘మాస్టర్ ప్లాన్‌’ !
చంద్రబాబు–పవన్ బ్రేక్‌ఫాస్ట్ భేటీలో ఎన్నికల వ్యూహంపై కీలక మంతనాలు
-శక్తిసామర్థ్యాల ఆధారంగానే సీట్ల పంపకం..
- క్షేత్రస్థాయిలో బలమున్న పార్టీకే ప్రాధాన్యం
-బీసీ రిజర్వేషన్లపై సుప్రీంకోర్టు తీర్పు తర్వాతే ఎన్నికల షెడ్యూల్‌పై కసరత్తు
-తొలి దశలో నగరపాలక సంస్థలు, పురపాలక సంఘాల ఎన్నికలపై ప్రధానంగా దృష్టి
-రాష్ట్ర, జిల్లా, నియోజకవర్గ స్థాయిల్లో సమన్వయ కమిటీల ఏర్పాటుకు నిర్ణయం
-వైసీపీకి అవకాశం లేకుండా కూటమి వ్యూహాత్మక అడుగులు
ఏపీ స్టేట్ బ్యూరో, అమరావతి :
రాష్ట్రంలో త్వరలో జరగనున్న స్థానిక సంస్థల ఎన్నికల నేపథ్యంలో కూటమి ప్రభుత్వం ఎన్నికల సమరానికి సన్నద్ధమవుతోంది. ఈ క్రమంలో ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కల్యాణ్ మధ్య మంగళవారం కీలక భేటీ జరిగింది. ఉండవల్లిలోని ముఖ్యమంత్రి నివాసానికి ఉదయం పవన్ కల్యాణ్ చేరుకోగా.. చంద్రబాబు, మంత్రి నారా లోకేశ్ ఆయనకు స్వాగతం పలికారు. అనంతరం ముగ్గురు నేతలు కలిసి బ్రేక్‌ఫాస్ట్ చేస్తూ స్థానిక సంస్థల ఎన్నికల్లో అనుసరించాల్సిన వ్యూహం, సీట్ల సర్దుబాటు, క్షేత్రస్థాయి సమీకరణాలపై సుదీర్ఘంగా చర్చించినట్లు సమాచారం.
బలమే ప్రామాణికం.. సీట్లపై కీలక నిర్ణయం
స్థానిక సంస్థల ఎన్నికల్లో కూటమి పక్షాలు సమన్వయంతో పనిచేయాలని సమావేశంలో నిర్ణయించినట్లు తెలుస్తోంది. సీట్ల పంపకంలో గత ఎన్నికల్లో వచ్చిన ఓట్ల శాతాలు, పార్టీ బలాబలాల కంటే ప్రస్తుతం క్షేత్రస్థాయిలో ఉన్న వాస్తవ బలాన్ని ప్రామాణికంగా తీసుకోవాలనే అంశంపై చర్చ జరిగినట్లు సమాచారం. ఏ నియోజకవర్గంలో ఏ పార్టీకి బలమైన కేడర్, ప్రజాదరణ, గెలిచే సామర్థ్యం ఉంటే.. ఆ పార్టీకి ఆ స్థానాన్ని కేటాయించేలా ముందుకు వెళ్లాలని నేతలు భావిస్తున్నట్లు తెలుస్తోంది.దీంతో స్థానిక సంస్థల ఎన్నికల్లో కూటమి భాగస్వామ్య పక్షాల మధ్య సీట్ల సర్దుబాటు కీలకంగా మారనుంది. ఎక్కడెక్కడ ఏ పార్టీ బలంగా ఉందన్న దానిపై నియోజకవర్గాల వారీగా పూర్తి స్థాయి కసరత్తు చేయాలని నిర్ణయించినట్లు సమాచారం.
తొలి దశ మున్సిపల్‌ ఎన్నికలపై ఫోకస్‌
తొలి దశలో జరగనున్న నగరపాలక సంస్థలు, పురపాలక సంఘాల ఎన్నికలపై చంద్రబాబు–పవన్ చర్చలో ప్రధానంగా దృష్టి సారించినట్లు తెలుస్తోంది. పట్టణ ప్రాంతాల్లో కూటమి బలాన్ని మరింత పటిష్టం చేసుకోవడంతో పాటు.. స్థానికంగా ఉన్న అసంతృప్తులు, వర్గ విభేదాలు, ఆశావహుల సంఖ్య వంటి అంశాలను ముందుగానే గుర్తించి పరిష్కరించుకోవాలని భావిస్తున్నట్లు సమాచారం.కూటమి పార్టీల మధ్య సమన్వయం లోపిస్తే ప్రత్యర్థులకు అవకాశం లభించే పరిస్థితి ఉండకూడదనే ఉద్దేశంతో.. క్షేత్రస్థాయి నాయకత్వం నుంచి రాష్ట్ర స్థాయి వరకు ఒకే వ్యూహంతో ముందుకు వెళ్లాలని నేతలు నిర్ణయించినట్లు తెలుస్తోంది.
సుప్రీం తీర్పు తర్వాత షెడ్యూల్?
బీసీ రిజర్వేషన్ల అంశంపై ప్రభుత్వం దాఖలు చేసిన స్పెషల్ లీవ్ పిటిషన్‌పై ఈ నెల శుక్రవారం సుప్రీంకోర్టులో విచారణ జరగనున్న నేపథ్యంలో చంద్రబాబు–పవన్ భేటీకి మరింత ప్రాధాన్యం ఏర్పడింది. బీసీ రిజర్వేషన్లపై సుప్రీంకోర్టు తీర్పు వెలువడిన తర్వాత స్థానిక సంస్థల ఎన్నికల ప్రక్రియ వేగం పుంజుకునే అవకాశం ఉందని కూటమి నేతలు అంచనా వేస్తున్నట్లు సమాచారం.తీర్పు అనంతరం ఎన్నికల షెడ్యూల్ విడుదలకు మార్గం సుగమమైతే.. తక్కువ సమయంలోనే అభ్యర్థుల ఎంపిక, సీట్ల సర్దుబాటు, ప్రచార వ్యూహాలను ఖరారు చేయాల్సి ఉంటుంది. అందుకే ముందుగానే క్షేత్రస్థాయిలో పార్టీ యంత్రాంగాన్ని సిద్ధం చేయాలని ముఖ్యమంత్రి, ఉప ముఖ్యమంత్రి నిర్ణయించినట్లు తెలుస్తోంది.
కమిటీలతో సమన్వయం..
స్థానిక ఎన్నికల కోసం రాష్ట్ర, జిల్లా, నియోజకవర్గ స్థాయిల్లో సమన్వయ కమిటీలను ఏర్పాటు చేసి కూటమి పార్టీల మధ్య సమాచార మార్పిడి, అభ్యర్థుల ఎంపిక, సీట్ల పంపకం వంటి అంశాలను సమన్వయం చేయాలని భావిస్తున్నట్లు సమాచారం. ప్రతి స్థానంలో కూటమి అభ్యర్థి గెలుపే లక్ష్యంగా పనిచేసేలా యంత్రాంగాన్ని సిద్ధం చేయాలని నిర్ణయించినట్లు తెలుస్తోంది.
వైసీపీకి అవకాశం ఇవ్వకూడదనే లక్ష్యం
స్థానిక ఎన్నికల్లో ప్రతిపక్ష వైసీపీకి పట్టు సాధించే అవకాశం లేకుండా కూటమి బలాన్ని పూర్తిగా వినియోగించుకోవాలన్నది ఈ భేటీలో ప్రధాన లక్ష్యంగా కనిపిస్తోంది. ముఖ్యంగా స్థానిక స్థాయిలో కూటమి ఓట్లు చీలకుండా చూడటం, బలమైన అభ్యర్థులను బరిలోకి దించడం, భాగస్వామ్య పార్టీల మధ్య విభేదాలు తలెత్తకుండా ముందస్తు సమన్వయం చేయడం వంటి అంశాలపై దృష్టి సారించినట్లు తెలుస్తోంది.మొత్తంగా.. సుప్రీంకోర్టు తీర్పు తర్వాత స్థానిక ఎన్నికల బిగుల్ మోగితే, కూటమి తరఫున ఎలాంటి వ్యూహంతో బరిలోకి దిగాలన్న దానిపై చంద్రబాబు–పవన్ భేటీ కీలక దిశానిర్దేశం చేసినట్లు రాజకీయ వర్గాల్లో చర్చ జరుగుతోంది.
