andhrapradesh
స్థానిక ఎన్నికల్లో కూటమి ఐక్యత శాశ్వతం కావాలి..
అమరావతి, నవంబర్ 18: రాబోయే గ్రామ పంచాయతీ ఎన్నికలతో పాటు మిగిలిన 23 పట్టణ స్థానిక సంస్థల (రెండో దశ) ఎన్నికల సన్నద్ధతపై తెలుగుదేశం పార్టీ అధినేత, ముఖ్యమంత్రి నారా చంద్రబాబు నాయుడు బుధవారం పార్టీ నేతలు, శ్రేణులతో టెలికాన్ఫరెన్స్ నిర్వహించారు. స్థానిక సంస్థల ఎన్నికల్లో ప్రతి వార్డులోనూ కూటమి జెండా ఎగరాలని, అందుకు నాయకులు, కార్యకర్తలు సమష్టిగా పనిచేయాలని ఆయన దిశానిర్దేశం చేశారు. కూటమి భాగస్వామ్య పక్షాల మధ్య ఐక్యత శాశ్వతంగా కొనసాగాలని, ప్రతి ఒక్కరూ పొత్తు ధర్మాన్ని విధిగా పాటించాలని చంద్రబాబు స్పష్టం చేశారు.
2024 ఎన్నికల్లో వచ్చిన ఓట్ల శాతం కంటే ఈసారి గణనీయంగా పెరిగేలా లక్ష్యంతో పనిచేయాలని చంద్రబాబు శ్రేణులకు సూచించారు. ఏ ఒక్క వార్డులో ఓడిపోయినా అందుకు గల కారణాలను లోతుగా విశ్లేషిస్తానని హెచ్చరించిన ఆయన, గ్రామాలు మరియు నియోజకవర్గాల్లో కూటమి పార్టీల మధ్య సమన్వయాన్ని పరిశీలించి తదుపరి నిర్ణయాలు తీసుకుంటామని తేల్చి చెప్పారు. విమర్శలు నిర్మాణాత్మకంగా ఉండాలే తప్ప, వ్యక్తిగత హననానికి పాల్పడేవారు రాజకీయాలకు అనర్హులని పేర్కొంటూ, ప్రజలకు వాస్తవాలను వివరించి ప్రతి ఎన్నికలోనూ కూటమి విజయమే లక్ష్యంగా ముందుకు సాగాలని సీఎం పిలుపునిచ్చారు.