స్థానిక ఎన్నికల వేళ వైసీపీ నుంచి టీడీపీలోకి భారీగా చేరికలు

 బుచ్చి మేజర్ న్యూస్ :
 11వ వార్డులో 100 వైసీపీ కుటుంబాలు టీడీపీలో చేరిక స్థానిక ఎన్నికల వేళ కోవూరు నియోజకవర్గంలో వైసీపీ నుంచి టీడీపీలోకి చేరికలు ఊపందుకున్నాయి. మంగళవారం సాయంత్రం బుచ్చిరెడ్డిపాళెం మున్సిపాలిటీ 11వ వార్డులో నిర్వహించిన ‘చెప్పాం.. చేస్తున్నాం’ ఇంటింటి ప్రచార కార్యక్రమంలో 100 వైసీపీ కుటుంబాలు తెలుగుదేశం పార్టీలో చేరాయి. వైసీపీ నాయకులు ఆళ్లపాక లక్ష్మయ్య, ఆళ్లపాక శేషయ్య సహా పలువురు టీడీపీలో చేరారు. రాష్ట్ర టీడీపీ మైనారిటీ విభాగం కార్యదర్శి షేక్‌ జాఫర్‌ బాషా, 11వ వార్డు టీడీపీ కౌన్సిలర్‌ అభ్యర్థి షేక్‌ జఫ్రుద్దీన్‌ ఆధ్వర్యంలో టీడీపీ బుచ్చిరెడ్డిపాళెం కార్యాలయంలో జరిగిన ఈ కార్యక్రమంలో కోవూరు ఎమ్మెల్యే శ్రీమతి వేమిరెడ్డి ప్రశాంతి రెడ్డి గారు పాల్గొని, పార్టీలో చేరిన వారికి పసుపు కండువాలు కప్పి సాదరంగా ఆహ్వానించారు.

కూటమి ప్రభుత్వంపై పెరుగుతున్న ప్రజల విశ్వాసం
ఈ సందర్భంగా ఎమ్మెల్యే ప్రశాంతి రెడ్డి గారు మాట్లాడుతూ.. ముఖ్యమంత్రి శ్రీ నారా చంద్రబాబు నాయుడు గారి నాయకత్వంలో కూటమి ప్రభుత్వం అమలు చేస్తున్న సంక్షేమ పథకాలు, చేపడుతున్న అభివృద్ధి కార్యక్రమాలపై ప్రజల్లో విశ్వాసం పెరుగుతోందని అన్నారు. వైసీపీ నుంచి పెద్ద సంఖ్యలో నాయకులు, కార్యకర్తలు టీడీపీలో చేరడం శుభపరిణామమని పేర్కొన్నారు. రాబోయే స్థానిక ఎన్నికల్లో కూటమి అభ్యర్థులందరినీ అత్యధిక మెజార్టీతో గెలిపించేందుకు ప్రతి ఒక్కరూ ఐక్యంగా కృషి చేయాలని పిలుపునిచ్చారు. కోవూరు నియోజకవర్గ ప్రజలకు విజయదశమి శుభాకాంక్షలు తెలియజేసిన ఎమ్మెల్యే గారు.. పేదల సంక్షేమం, నియోజకవర్గ అభివృద్ధికి మరింత కృషి చేస్తామని హామీ ఇచ్చారు. అర్హులైన ప్రతి ఒక్కరికీ రాబోయే మూడు నెలల్లో ఇళ్ల స్థలాలు అందేలా చర్యలు తీసుకుంటామని తెలిపారు.

నెల్లూరులో వైసీపీ సీనియర్‌ నాయకుల చేరిక
మంగళవారం సాయంత్రం నెల్లూరులోని ఎమ్మెల్యే గారి స్వగృహంలో వైసీపీ సీనియర్‌ నాయకులు సర్దార్‌, బషీర్‌ ఎమ్మెల్యే వేమిరెడ్డి ప్రశాంతి రెడ్డి గారి సమక్షంలో టీడీపీలో చేరారు. టీడీపీ నాయకులు షేక్‌ రహ్మత్‌ బాషా, మహబూబ్‌ బాషా ఆధ్వర్యంలో జరిగిన ఈ చేరికల సందర్భంగా ఎమ్మెల్యే గారు వారికి పసుపు కండువాలు కప్పి పార్టీలోకి ఆహ్వానించారు. బుచ్చిరెడ్డిపాళెం మున్సిపాలిటీలోని 8వ వార్డు నుంచి బషీర్‌ స్వతంత్ర అభ్యర్థిగా నామినేషన్‌ దాఖలు చేశారు. కూటమి అభ్యర్థుల విజయానికి పూర్తి మద్దతు అందిస్తామని వారు తెలిపారు.

ఉదయం 15 మంది వైసీపీ నాయకులు టీడీపీలోకి
మంగళవారం ఉదయం నెల్లూరులోని ఎమ్మెల్యే వేమిరెడ్డి ప్రశాంతి రెడ్డి గారి నివాసంలో బుచ్చిరెడ్డిపాళెంకు చెందిన 15 మంది వైసీపీ నాయకులు టీడీపీలో చేరారు. టీడీపీ నాయకులు కేతంరెడ్డి వినోద్‌, ప్రతాప్‌రెడ్డి ఆధ్వర్యంలో వచ్చిన వారికి ఎమ్మెల్యే పసుపు కండువాలు కప్పి పార్టీలోకి ఆహ్వానించారు.

కొడవలూరు నుంచి 50 మంది వైసీపీ కార్యకర్తల చేరిక
మంగళవారం సాయంత్రం నెల్లూరులోని వీపీఆర్‌ కార్యాలయంలో కొడవలూరు టీడీపీ నాయకుడు గరికపాటి రాజేంద్ర ఆధ్వర్యంలో 50 మంది వైసీపీ కార్యకర్తలు టీడీపీలో చేరారు. ఎమ్మెల్యే వేమిరెడ్డి ప్రశాంతి రెడ్డి గారు వారిని సాదరంగా ఆహ్వానించి, స్థానిక ఎన్నికల్లో కూటమి అభ్యర్థుల విజయానికి సమష్టిగా కృషి చేయాలని కోరారు.

పెద్దూరుకు చెందిన విజయ భాస్కర్‌రెడ్డి అనుచరులతో కలిసి టీడీపీలోకి
బుచ్చిరెడ్డిపాళెం పట్టణంలోని పెద్దూరుకు చెందిన వైసీపీ నాయకుడు విజయ భాస్కర్‌రెడ్డి తన అనుచరులతో కలిసి టీడీపీలో చేరారు. మంగళవారం సాయంత్రం బుచ్చిరెడ్డిపాళెం 2వ వార్డులో నిర్వహించిన ‘చెప్పాం.. చేస్తున్నాం’ ఇంటింటి ప్రచార కార్యక్రమంలో ఎమ్మెల్యే వేమిరెడ్డి ప్రశాంతి రెడ్డిని కలిసిన ఆయన, తన అనుచరులతో కలిసి టీడీపీలో చేరారు. 
కోవూరు నియోజకవర్గంలో వివిధ ప్రాంతాల నుంచి వైసీపీ నాయకులు, కార్యకర్తలు టీడీపీలో చేరుతుండటంతో కూటమి శ్రేణుల్లో ఉత్సాహం నెలకొంది. రాబోయే స్థానిక ఎన్నికల్లో కూటమి అభ్యర్థుల విజయమే లక్ష్యంగా నాయకులు, కార్యకర్తలు సమన్వయంతో ముందుకు సాగాలని ఎమ్మెల్యే ప్రశాంతి రెడ్డి గారు పిలుపునిచ్చారు.