శ్రీశ్రీశ్రీ దేవి అమ్మవారి ఆలయంలో వైభవంగా దుర్గాదేవి చండీ హోమం

అనపర్తి, మేజర్ న్యూస్. మండలంలోని, రామవరం గ్రామంలోని చెరువు వీధిలో కొలువై ఉన్న శ్రీశ్రీశ్రీ దేవి అమ్మవారి ఆలయంలో 59వ శరన్నవరాత్రి ఉత్సవాల్లో భాగంగా తొమ్మిది రోజులపాటు నిర్వహించిన దుర్గా చండీ హోమ కార్యక్రమాలు భక్తిశ్రద్ధలతో వైభవంగా జరిగాయి. మహానవమి పర్వదినాన్ని పురస్కరించుకుని తొమ్మిదవ రోజు నిర్వహించిన ప్రత్యేక హోమ కార్యక్రమంలో గ్రామస్థులు, పరిసర ప్రాంతాల భక్తులు పెద్ద సంఖ్యలో పాల్గొన్నారు. ఆలయ ప్రధాన అర్చకులు శ్రీ చెళ్ళపిళ్ళ త్రిమూర్తి శర్మ కుమారులు వెంకట శాస్త్రి, పవన్ శర్మల ఆధ్వర్యంలో తొమ్మిది రోజులపాటు ప్రతిరోజూ అమ్మవారికి విశేష పూజలు, దుర్గా చండీ హోమం శాస్త్రోక్తంగా నిర్వహించారు.

 వేదమంత్రాల నడుమ జరిగిన హోమ కార్యక్రమాలతో ఆలయ ప్రాంగణం ఆధ్యాత్మిక వాతావరణాన్ని సంతరించుకుంది. మహానవమి సందర్భంగా నిర్వహించిన చండీ హోమంలో భక్తులు పాల్గొని అమ్మవారిని దర్శించుకున్నారు. అనంతరం తీర్థప్రసాదాలు స్వీకరించి అమ్మవారి ఆశీస్సులు పొందారు. నవరాత్రి ఉత్సవాల సందర్భంగా ఆలయానికి భక్తుల రాకతో పరిసర ప్రాంతాల్లో పండుగ వాతావరణం నెలకొంది. ఈ కార్యక్రమంలో బీజేపీ జిల్లా ఉపాధ్యక్షులు మల్లిడి సురేంద్ర రెడ్డి దంపతులు, రామవరం గ్రామ అభివృద్ధి కమిటీ చైర్మన్ మండ సతీష్ రెడ్డి దంపతులు, పూర్వపు శివాలయ కమిటీ చైర్మన్ నల్లమిల్లి సత్యనారాయణ రెడ్డి (చిన్నబ్బు) దంపతులు పాల్గొని అమ్మవారిని దర్శించుకున్నారు. వీరితో పాటు పలువురు గ్రామ ప్రముఖులు, భక్తులు పాల్గొన్నారు.తొమ్మిది రోజులపాటు భక్తిభావంతో నిర్వహించిన దుర్గా చండీ హోమ కార్యక్రమాలు భక్తులకు ఆధ్యాత్మిక అనుభూతిని అందించాయి.