ఎన్నికలు రాగానే పంజాబ్ గుర్తొచ్చిందా?: అమిత్ షాపై భగవంత్ మాన్ ధ్వజం!

సూర్య పొలిటికల్ & నేషనల్ డెస్క్, చండీగఢ్: కేంద్ర హోంమంత్రి అమిత్ షా పంజాబ్ పర్యటనపై ముఖ్యమంత్రి భగవంత్ మాన్ తీవ్రస్థాయిలో ధ్వజమెత్తారు. రాష్ట్రంలో ఎన్నికలు సమీపిస్తున్న వేళ మాత్రమే బీజేపీకి పంజాబ్ ప్రజల బాధలు, డ్రగ్స్ సమస్య గుర్తుకొస్తున్నాయని ఎద్దేవా చేశారు. పంజాబ్‌ను డ్రగ్స్ రహిత రాష్ట్రంగా మారుస్తామంటూ కపట ప్రేమను ఒలకబోస్తున్న కేంద్ర హోంమంత్రి తన పర్యటన వెనుక ఉన్న రాజకీయ ప్రయోజనాలను పక్కనపెట్టి, కేంద్రం తన బాధ్యతలను సక్రమంగా నిర్వర్తించడంలో ఎందుకు విఫలమైందో సమాధానం చెప్పాలని నిలదీశారు.

అకాలీ-బీజేపీ హయాంలో డ్రగ్స్ పెరిగినప్పుడు ఎక్కడున్నారు?:
2007 నుంచి 2017 వరకు పంజాబ్‌లో శిరోమణి అకాలీదళ్-బీజేపీ సంకీర్ణ ప్రభుత్వం అధికారంలో ఉన్న విషయాన్ని భగవంత్ మాన్ గుర్తుచేశారు. ఆ దశాబ్ద కాలంలో రాష్ట్రంలో క్వింటాళ్ల కొద్దీ మత్తు పదార్థాలు బహిరంగంగా చలామణి అవుతూ మాదకద్రవ్యాల మహమ్మారి తీవ్ర సంక్షోభంగా మారినప్పుడు పంజాబ్‌ను కాపాడాలనే ఆలోచన బీజేపీకి ఎందుకు రాలేదని ఆయన ప్రశ్నించారు. రైతుల చారిత్రక నిరసనల సమయంలో సరిహద్దుల్లో 700 మందికి పైగా అన్నదాతలు అమరులైనప్పుడు ఏ ఒక్క బీజేపీ నేత కూడా వారి కుటుంబాలను పరామర్శించడానికి రాలేదని, ఆ కుటుంబాలకు నష్టపరిహారంతో పాటు ప్రభుత్వ ఉద్యోగాలు ఇచ్చి ఆదుకున్నది తమ ఆమ్ ఆద్మీ పార్టీ ప్రభుత్వమేనని స్పష్టం చేశారు.

పాకిస్తాన్ సరిహద్దులో యాంటీ-డ్రోన్ వ్యవస్థ ఎందుకు ఇవ్వలేదు?:
పాకిస్తాన్‌తో పంజాబ్‌కు సుమారు 550 కిలోమీటర్ల అంతర్జాతీయ సరిహద్దు ఉందని, సరిహద్దు వెంబడి 50 కిలోమీటర్ల మేర రక్షణ బాధ్యత కేంద్ర హోంశాఖ పరిధిలోని సరిహద్దు భద్రతా దళం (BSF) ఆధీనంలోనే ఉంటుందని ముఖ్యమంత్రి పేర్కొన్నారు. పాకిస్తాన్ నుంచి డ్రోన్ల ద్వారా విచ్చలవిడిగా వస్తున్న డ్రగ్స్, ఆయుధాలను అడ్డుకునేందుకు అధునాతన 'యాంటీ-డ్రోన్ వ్యవస్థలను' ఏర్పాటు చేయాలని కేంద్ర హోంమంత్రితో స్వయంగా ఎన్నోసార్లు సమావేశమై విజ్ఞప్తి చేసినా ఎందుకు అనుమతించలేదని ఆయన ఆగ్రహం వ్యక్తం చేశారు. గుజరాత్‌లోని కాండ్లా పోర్టు ద్వారా వేల కిలోల డ్రగ్స్ పట్టుబడుతున్నా, బీజేపీ పాలిత రాష్ట్రాల మీదుగానే మత్తు పదార్థాలు దేశంలోకి ప్రవేశిస్తున్నా కేంద్రం ప్రేక్షకపాత్ర వహిస్తోందని మండిపడ్డారు.

తీహార్, సబర్మతి జైళ్లలోని గ్యాంగ్‌స్టర్లపై చర్యలేవి?:
పంజాబ్‌లో గ్యాంగ్‌స్టర్ల అణచివేత గురించి మాట్లాడే హోంమంత్రి, హత్యలకు బాధ్యత వహిస్తూ నెట్‌వర్క్‌లను నడుపుతున్న కరడుగట్టిన గ్యాంగ్‌స్టర్లు గుజరాత్‌లోని సబర్మతి జైలులోనూ, ఢిల్లీలోని తీహార్ జైలులోనూ కేంద్ర ప్రభుత్వ పర్యవేక్షణలోనే ఉన్నారని గుర్తించాలని హితవు పలికారు. పంజాబ్ వైపు వేలు చూపించే ముందు కేంద్రం తన సొంత వైఫల్యాలను సరిదిద్దుకోవాలని, డ్రగ్ పెడ్లర్లకు వెంటనే బెయిల్ రాకుండా ఎన్‌డీపీఎస్ (NDPS) చట్టాన్ని మరింత కఠినతరం చేసి కేంద్రం తన ప్రాథమిక బాధ్యతలను నెరవేర్చాలని భగవంత్ మాన్ డిమాండ్ చేశారు.