సీఐఐ రీజనల్ సమ్మిట్‌ను సమన్వయంతో విజయవంతం చేయాలి
*ఏర్పాట్లను పరిశీలించిన జిల్లా కలెక్టర్ ఎం. అభిషిక్త్ కిశోర్
విశాఖపట్నం, అక్టోబర్ 06: గంభీరంలోని ఐఐఎం-విలో బుధవారం జరగనున్న సీఐఐ రీజనల్ సమ్మిట్‌ను అన్ని శాఖల అధికారులు సమన్వయంతో పనిచేసి విజయవంతం చేయాలని జిల్లా కలెక్టర్ ఎం. అభిషిక్త్ కిశోర్ ఆదేశించారు. మంగళవారం ఐఐఎంలో సమ్మిట్ కోసం చేపడుతున్న ఏర్పాట్లను ఏపీఈడీబీ సీఈవో సగిలి షాన్మోహన్, ఇండస్ట్రీస్ మేనేజింగ్ డైరెక్టర్ బన్షాల్, జేసీ విద్యాధ‌రి, డీసీపీ మ‌ణికంఠ తదితరులతో కలిసి కలెక్టర్ క్షుణ్ణంగా పరిశీలించారు. సమ్మిట్ నిర్వహణకు సంబంధించి ప్రధాన వేదిక, సమాంతర సమావేశాలు, ఎగ్జిబిషన్, ఏపీ పెవిలియన్, ప్రతినిధుల రిజిస్ట్రేషన్, పార్కింగ్, వేదికల వద్ద మౌలిక వసతులు, సైన్‌బోర్డులు, ప్రతినిధులకు అవసరమైన సౌకర్యాలు తదితర అంశాలను చూసిన ఆయ‌న కార్యక్రమానికి హాజరయ్యే ప్రముఖులు, పారిశ్రామికవేత్తలు, వివిధ కంపెనీల ప్రతినిధులకు ఎలాంటి అసౌకర్యం కలగకుండా ఏర్పాట్లు ఉండాలని సూచించారు.
సీఐఐ రీజనల్ సమ్మిట్‌లో కేంద్ర మంత్రి రామ్మోహన్ నాయుడు, రాష్ట్ర మంత్రులు టీజీ భరత్, బీసీ జనార్ధన్ రెడ్డి, ఉత్తరాంధ్ర ప్రాంతానికి చెందిన ప్రజా ప్రతినిధులు, వివిధ పారిశ్రామిక సంస్థలు, కంపెనీల ప్రతినిధులు, పారిశ్రామికవేత్తలు పాల్గొననున్న నేపథ్యంలో ఏర్పాట్లలో ఎలాంటి లోటుపాట్లు ఉండరాదని స్పష్టం చేశారు. సమ్మిట్ ద్వారా ఉత్తరాంధ్రలో పెట్టుబడులకు ఉన్న అవకాశాలు, పారిశ్రామికాభివృద్ధికి అనుకూలమైన వాతావరణం, మౌలిక వసతులు, అందుబాటులో ఉన్న వనరులు, వివిధ రంగాల్లో పెట్టుబడులకు ప్రభుత్వం అందిస్తున్న ప్రోత్సాహకాలను పారిశ్రామికవేత్తలకు వివరించేలా కార్యక్రమాన్ని సమర్థవంతంగా నిర్వహించాలని సూచించారు. అన్ని సంబంధిత శాఖలు పరస్పరం సమన్వయం చేసుకుంటూ పనిచేయాలని, అప్పగించిన బాధ్యతల్లో ఎలాంటి నిర్లక్ష్యానికి తావివ్వరాదని స్పష్టం చేశారు. వివిధ విభాగాల అధికారులు, ఏపీఈడీబీ, పరిశ్రమల శాఖ అధికారులు తదితరులు పాల్గొన్నారు.
