సర్వేపల్లిలో టీడీపీకి ఎదురుదెబ్బ: కాకాణి

సర్వేపల్లి,  మేజర్ న్యూస్ :    సర్వేపల్లి నియోజకవర్గంలో తెలుగుదేశం పార్టీ రోజురోజుకూ బలహీనపడుతోందని, వైఎస్సార్‌సీపీ తిరుగులేని శక్తిగా ఎదుగుతోందని మాజీ మంత్రి, ఉమ్మడి నెల్లూరు జిల్లా వైఎస్సార్‌సీపీ అధ్యక్షుడు డాక్టర్ కాకాణి గోవర్ధన్‌రెడ్డి అన్నారు. శనివారం నెల్లూరులోని ఆయన నివాసంలో తోటపల్లిగూడూరు మండలం సౌత్ ఆమలూరు గ్రామానికి చెందిన 50 కుటుంబాలు టీడీపీని వీడి వైఎస్సార్‌సీపీలో చేరాయి. కోడి రవి, కోడి శ్రీనివాసులు, ఇంట్లూరు లోకేష్, మబ్బు అనిల్, ఇంట్లూరు అనిల్ తదితరులకు కాకాణి పార్టీ కండువాలు కప్పి సాదరంగా ఆహ్వానించారు.ఈ సందర్భంగా కాకాణి మాట్లాడుతూ సోమిరెడ్డి చంద్రమోహన్‌రెడ్డి తీరుతోనే సర్వేపల్లిలో టీడీపీకి నష్టం జరుగుతోందని విమర్శించారు. అధికార పార్టీని వీడి ప్రతిపక్ష వైఎస్సార్‌సీపీలోకి యువత, నాయకులు చేరడం శుభపరిణామమన్నారు. గతంలో పార్టీకి దూరమైన వారు తిరిగి జగన్ నాయకత్వాన్ని బలపరిచేందుకు ముందుకు వస్తున్నారని తెలిపారు. స్థానిక సంస్థల ఎన్నికల వేళ వైఎస్సార్‌సీపీలో చేరికలు పెరగడం టీడీపీకి ఎదురుదెబ్బ అని పేర్కొన్నారు. పార్టీలో చేరిన ప్రతి ఒక్కరికీ సముచిత స్థానం కల్పిస్తామని, జగన్‌ను తిరిగి ముఖ్యమంత్రిని చేసేందుకు అందరూ కలిసికట్టుగా పనిచేయాలని కాకాణి పిలుపునిచ్చారు.