ఎన్నికల సందేహాల నివృత్తికి హెల్ప్‌లైన్ కాల్ సెంటర్

నెల్లూరు కలెక్టరేట్,  మేజర్ న్యూస్  :   స్థానిక సంస్థల ఎన్నికల నేపథ్యంలో నెల్లూరు కలెక్టరేట్‌లోని తిక్కన ప్రాంగణంలో ఏర్పాటు చేసిన హెల్ప్‌లైన్ కాల్ సెంటర్ నిరంతరం సేవలందిస్తోందని జిల్లా కలెక్టర్, జిల్లా ఎన్నికల అధికారి హిమాన్షు శుక్లా తెలిపారు. ఈ నెల 14న ఎన్నికల నోటిఫికేషన్ విడుదలైనప్పటి నుంచి అక్టోబర్ 23వ తేదీ వరకు సుమారు 50 మంది ప్రజలు ఎన్నికల ప్రక్రియకు సంబంధించిన సందేహాల నివృత్తి కోసం కాల్ సెంటర్‌ను సంప్రదించినట్లు వెల్లడించారు. ప్రజల సందేహాలకు సిబ్బంది సమాధానాలు అందించడంతో పాటు, సమస్యలను సంబంధిత శాఖల అధికారుల దృష్టికి తీసుకెళ్లి పరిష్కారానికి చర్యలు చేపడుతున్నట్లు పేర్కొన్నారు.  కాల్ సెంటర్‌లో మూడు షిఫ్టుల్లో సిబ్బంది విధులు నిర్వహిస్తున్నారని, ప్రతి షిఫ్టులో ఎనిమిది మంది చొప్పున మొత్తం 24 మంది సేవలందిస్తున్నట్లు తెలిపారు. ఎన్నికల ప్రక్రియపై ప్రజలకు అవసరమైన సమాచారం అందించడం, సందేహాలను నివృత్తి చేయడం, సమస్యల పరిష్కారానికి సమన్వయం చేయడం కాల్ సెంటర్ ప్రధాన ఉద్దేశమని వివరించారు.  ఎన్నికలకు సంబంధించి ఏవైనా సందేహాలు లేదా సమస్యలు ఎదురైతే ప్రజలు 0861-2331261 హెల్ప్‌లైన్ నంబర్‌కు ఫోన్ చేయాలని, 7995576699 వాట్సాప్ నంబర్ ద్వారా కూడా సంప్రదించి సేవలను వినియోగించుకోవాలని జిల్లా కలెక్టర్ హిమాన్షు శుక్లా సూచించారు.