సరస్వతీ దేవి అలంకారంలో జొన్నవాడ కామాక్షితాయి కనువిందు

నెల్లూరు కల్చరల్ మేజర్ న్యూస్ 
ప్రసిద్ధ పుణ్యక్షేత్రమైన శ్రీ పొట్టి శ్రీరాములు నెల్లూరు జిల్లా, బుచ్చిరెడ్డిపాలెం మండలం జొన్నవాడ శ్రీ మల్లికార్జున స్వామి కామాక్షితాయి దేవస్థానంలో శరన్నవరాత్రి మహోత్సవాలు అత్యంత వైభవంగా కొనసాగుతున్నాయి. ఉత్సవాల్లో భాగంగా ఆరవ రోజైన పవిత్ర మూలా నక్షత్రం సందర్భంగా శ్రీ కామాక్షితాయి అమ్మవారు చదువుల తల్లి ‘శ్రీ సరస్వతీ దేవి’ అలంకారంలో భక్తులకు దర్శనమిచ్చారు. శ్వేత వస్త్రాలు ధరించి, చేతులలో వీణ, పుస్తకం, జపమాలతో కొలువుదీరిన అమ్మవారిని దర్శించుకునేందుకు భక్తులు, ముఖ్యంగా విద్యార్థులు పెద్ద సంఖ్యలో ఆలయానికి తరలివచ్చారు.ఆలయ అర్చకులు, వేద పండితుల మంత్రోచ్ఛారణల మధ్య మహా సరస్వతీ పూజను భక్తిశ్రద్ధలతో జరిపించారు. విద్యార్థులకు ఏకాగ్రత, జ్ఞానం, ఉన్నత విద్యా ప్రాప్తి కలగాలని ఆకాంక్షిస్తూ తల్లిదండ్రులు తమ చిన్నారులకు అమ్మవారి సన్నిధిలో అక్షరాభ్యాసాలు, ప్రత్యేక పూజలు చేయించారు.
ఈ పర్వదినం సందర్భంగా గత పదేళ్లుగా కొనసాగుతున్న సంప్రదాయం ప్రకారం సింగరాయకొండ వాస్తవ్యులైన శ్రీ కామాక్షితాయి భక్త బృందం ఆధ్వర్యంలో విద్యార్థులకు ‘పుస్తక ప్రసాద’ పంపిణీ జరిగింది. అమ్మవారి సన్నిధిలో ప్రత్యేకంగా పూజించిన నోట్ పుస్తకాలు, పెన్నులు, ఇతర విద్యా సామగ్రిని ఆలయానికి విచ్చేసిన చిన్నారులకు, విద్యార్థులకు ఉచితంగా అందజేశారు. దేవస్థాన సహాయ కమిషనర్, కార్యనిర్వహణాధికారి వెంకట శ్రీనివాసులు రెడ్డి ఆలయ ఏర్పాట్లను స్వయంగా పర్యవేక్షించారు.