సాగునీరు అందించాలి

బాడంగి, సూర్య: రైతులకు సాగునీరు అందేలా చర్యలు చేపట్టాలని జిల్లా కాంగ్రెస్‌ అధ్యక్షుడు మరిపి విద్యాసాగర్‌ డిమాండ్‌ చేశారు. గురువారం భీమవరం గ్రామంలో మండల అధ్యక్షుడు లచ్చిపతుల రామానందం ఆధ్వర్యంలో నిర్వహించిన కాంగ్రెస్‌ కార్యకర్తల సమావేశంలో ఆయన పాల్గొన్నారు. ఈ సందర్భంగా గ్రామస్థులు, రైతుల సమస్యలను అడిగి తెలుసుకున్నారు.
భోజరాంపురం–అప్పలనాయుడు చెరువు, భోజరాంపురం–కైకాల చెరువు కాలువల్లో పేరుకుపోయిన మేటలను తొలగించాలని, పిడుగుపాటుకు మృతి చెందిన లచ్చిపతుల సింహాచలం కుటుంబానికి నష్టపరిహారం అందించాలని కోరారు. గ్రామంలోని విద్యుత్‌ సమస్యలను కూడా పరిష్కరించాలని డిమాండ్‌ చేశారు. గ్రామస్థులు తెలిపిన సమస్యలను అధికారుల దృష్టికి తీసుకెళ్లి పరిష్కారానికి కృషి చేస్తామని విద్యాసాగర్‌ తెలిపారు. అనంతరం పలువురు గ్రామస్థులకు కాంగ్రెస్‌ పార్టీ కండువాలు కప్పి విద్యాసాగర్‌ పార్టీలోకి ఆహ్వానించారు. కార్యక్రమంలో మువ్వల శ్రీనివాసరావుతో పాటు పలువురు నాయకులు, కార్యకర్తలు పాల్గొన్నారు.