andhrapradesh
రోడ్డు ప్రమాదంలో యువకులకు గాయాలు
అరకులోయ, నవంబర్ 13, మేజర్ న్యూస్:
స్థానిక పోలీస్ స్టేషన్ పరిధిలో శుక్రవారం జరిగిన రోడ్డు ప్రమాదంలో గిరిజన యువకులు తీవ్రంగా గాయపడ్డారు. ప్రమాదవశాత్తు చోటు చేసుకున్న ఈ ఘటనలో తీవ్రంగా గాయపడిన ఇద్దరు యువకుల ఆరోగ్య పరిస్థితి విషమంగా ఉంది. మండలంలోని బస్కీ పంచాయతీ కి చెందిన గిర్లిగుడ గ్రామ వాస్తవ్యులు లక్ష్మణ్,అప్పారావు ద్విచక్ర వాహనంపై అరుకు వారపు సంతకు వెళ్లి నిత్యావసర వస్తువులు కొనుగోలు చేసుకొని స్వగ్రామానికి వెళ్లేందుకు తిరిగి వస్తుండగా ఈ ప్రమాదం జరిగింది. అరకులోయ వైపు నుంచి ఎదురుగా వస్తున్న కారు అదుపు తప్పి చొంపి జాతీయ రహదారి జంక్షన్ వద్ద ద్విచక్ర వాహనానికి బలంగా ఢీకొట్టింది.దీంతో ద్విచక్ర వాహనంపై ఉన్న ఇద్దరు గిరిజన యువకులు తీవ్రంగా గాయపడి కిందకు పడ్డారు.ఈ బాధితులను కొంతమంది అత్యవసర చికిత్స నిమిత్తం 108 వాహనంపై ఆసుపత్రి తరలించారు.
