కేన్సర్ మందుల ధరల నియంత్రణపై ఎన్‌పీపీఏ కఠిన నిఘా
సూర్య జాతీయ డెస్క్: కేన్సర్ చికిత్సను మరింత అందుబాటులోకి తెచ్చేలా కేంద్ర ప్రభుత్వం కీలక నిర్ణయం తీసుకుంది. షెడ్యూల్డ్ జాబితాలో లేని 137 రకాల యాంటీ-కేన్సర్ మందులపై ట్రేడ్ మార్జిన్ రేషనలైజేషన్ (టీఎంఆర్) అమలును కఠినంగా పర్యవేక్షించాలని నేషనల్ ఫార్మాస్యూటికల్ ప్రైసింగ్ అథారిటీ (ఎన్‌పీపీఏ) ఆదేశించింది. సవరించిన గరిష్ట రిటైల్ ధరలు (ఎంఆర్‌పీ) నవంబర్ 9, 2026 నుంచి అమల్లోకి వచ్చాయని స్పష్టం చేసింది. ఈ మేరకు అక్టోబర్ 17 నాడే గెజిట్ నోటిఫికేషన్ విడుదల చేసినట్లు వెల్లడించింది.
ఫార్మా కంపెనీల నుంచి వచ్చిన దరఖాస్తుల ఆధారంగా సవరించిన ధరల జాబితాను ఎన్‌పీపీఏ వెబ్‌సైట్‌తో పాటు 'ఫార్మా సహీ దామ్' యాప్ మరియు పోర్టల్‌లో అందుబాటులో ఉంచారు. తయారీదారులు, రిటైలర్లు, డీలర్లు, స్టాకిస్టులు, ఆసుపత్రులు మరియు వైద్య సంస్థలు సవరించిన ధరలను కచ్చితంగా పాటించాలని, తమ ప్రాంగణాల్లో మరియు వెబ్‌సైట్లలో ఈ ధరల జాబితాను ప్రముఖంగా ప్రదర్శించాలని ఆదేశించారు. నిబంధనలను ఉల్లంఘిస్తే డ్రగ్స్ ప్రైసెస్ కంట్రోల్ ఆర్డర్ (డీపీసీవో) కింద తగిన చర్యలు తీసుకోనున్నట్లు హెచ్చరించారు.
ధరల అమలును పర్యవేక్షించాలని రాష్ట్రాల డ్రగ్ కంట్రోలర్లను ఎన్‌పీపీఏ కోరింది. మందుల ధరల విషయంలో ఏవైనా ఫిర్యాదులు ఉంటే వినియోగదారులు 'ఫార్మా సహీ దామ్' యాప్ ద్వారా లేదా ప్రత్యేక హెల్ప్‌లైన్ నంబర్ల ద్వారా సంప్రదించవచ్చని తెలిపారు. కేన్సర్ రోగులపై ఆర్థిక భారాన్ని తగ్గించే దిశగా ప్రభుత్వం తీసుకుంటున్న ఈ చర్యలు ఎంతగానో దోహదపడతాయని నిపుణులు అభిప్రాయపడుతున్నారు.
