పేదల సొంతింటి కల సాకారం

విజయవాడ, సెప్టెంబర్ 29, మేజర్ న్యూస్ : విజయవాడ సెంట్రల్ నియోజకవర్గంలోని పేదల చిరకాల కల నెరవేరబోతోందని ప్రభుత్వ విప్, విజయవాడ సెంట్రల్ ఎమ్మెల్యే బొండా ఉమామహేశ్వరరావు తెలిపారు. బుధవారం (సెప్టెంబర్ 30) సింగ్‌నగర్‌లోని మాకినేని బసవ పున్నయ్య స్టేడియంలో ముఖ్యమంత్రి నారా చంద్రబాబు నాయుడు చేతుల మీదుగా నిర్వహించనున్న ‘పేదలకు పట్టాభిషేకం’ కార్యక్రమంలో 24,057 కుటుంబాలకు క్రమబద్ధీకరణ పట్టాలు అందజేయనున్నట్లు తెలిపారు. మంగళవారం స్టేడియంలో కార్యక్రమ ఏర్పాట్లను ఎమ్మెల్యే పరిశీలించారు. ఈ సందర్భంగా ఆయన మాట్లాడుతూ.. ఎన్నో ఏళ్లుగా ఇళ్లలో నివసిస్తున్నప్పటికీ పూర్తి హక్కులు లేని పేదలకు ఉచితంగా ఇళ్ల రిజిస్ట్రేషన్ చేసి శాశ్వత భూహక్కులు కల్పించడం చారిత్రాత్మక నిర్ణయమన్నారు. రిజిస్ట్రేషన్ ద్వారా పేదలకు తమ ఇళ్లపై చట్టబద్ధమైన హక్కులు లభించడంతో పాటు, పిల్లల చదువులు, వివాహాలు, వైద్య అవసరాలు వంటి కుటుంబ అవసరాలకు ఆస్తిని ఉపయోగించుకునే అవకాశం కలుగుతుందని తెలిపారు. అవసరమైన సందర్భాల్లో బ్యాంకు రుణాలు పొందేందుకు కూడా ఈ ఆస్తి ఉపయోగపడుతుందని పేర్కొన్నారు. పేదల ఇళ్లకు శాశ్వత హక్కులు కల్పించాలనే అంశాన్ని ముఖ్యమంత్రి దృష్టికి తీసుకెళ్లడంతో పాటు, అసెంబ్లీలోనూ ప్రస్తావించి జీఓ 30 ద్వారా పేదల తరఫున నిరంతరం కృషి చేశానని బొండా ఉమా తెలిపారు. “పేదల సొంతింటి కల నెరవేరడం ఎంతో ఆనందంగా ఉంది. ఈ ఇళ్ల పట్టాలు పేదలకు కేవలం కాగితం కాదు.. వారి పిల్లల భవిష్యత్తుకు భరోసా, తరతరాలకు ఆస్తి హక్కు” అని అన్నారు. పేదల భూహక్కుల కార్యక్రమం ద్వారా తమ జీవితకాల స్వప్నం నెరవేరుతున్నందుకు లబ్ధిదారులు ముఖ్యమంత్రి నారా చంద్రబాబు నాయుడుకు కృతజ్ఞతలు తెలిపారు. కార్యక్రమాన్ని విజయవంతం చేయాలని ఎమ్మెల్యే బొండా ఉమామహేశ్వరరావు ప్రజలకు పిలుపునిచ్చారు.