రావులపాలెం గ్రామపంచాయతీకి స్వచ్ఛ ఆంధ్ర అవార్డు

రావులపాలెం మేజర్ న్యూస్

పారిశుధ్య నిర్వహణలో అగ్రగామిగా ఉన్న కోనసీమ ముఖద్వారం రావులపాలెం గ్రామపంచాయతీకి స్వచ్ఛాంధ్ర - స్వర్ణాంద్ర అవార్డు దక్కింది. గాంధీ జయంతి సందర్భంగా శుక్రవారం అమరావతిలో ముఖ్యమంత్రి చంద్రబాబునాయుడు చేతులమీదుగా ఈ అవార్డును పంచాయతీ అభివృద్ధి అధికారి ఎల్ దుర్గాప్రసాద్ అందుకోనున్నారు. సుమారు 35 వేల జనాభాతో విస్తరించి ఉన్న ఈ గ్రామం పారిశుద్ధ్య నిర్వహణలో భేష్ అనిపించుకుంటుంది. ఇంటింటికి చెత్త సేకరణ, అలాగే చెత్త నుండి సంపద తయారీ కేంద్రం నిర్వహణ తదితర విషయాల్లో ఈ పంచాయతీకి అవార్డు దక్కింది. ఇప్పటికే రాష్ట్రంలోనే తొలి ఐఎస్ఓ సర్టిఫికెట్ ను ఈ రావులపాలెం పంచాయతీ అందుకున్న సంగతి తెలిసిందే. గ్రామంలో వార్డులన్నిటిని పది విభాగాలుగా విభజించి సక్రమంగా పారిశుధ్య నిర్వహణ చేపట్టడం అలాగే ఎప్పటికప్పుడు అవగాహన సదస్సులు, ర్యాలీలు నిర్వహించి ప్రజలకు తడిపొడి చెత్త సేకరణపై అవగాహన కల్పించడం  వంటి అంశాలను పరిగణనలోకి తీసుకుని ఈ అవార్డుకు ఎంపిక చేశారు.రాష్ట్రవ్యాప్తంగా 12 గ్రామపంచాయతీలు ఈ అవార్డుకు ఎంపికయ్యాయి. అందులో ఉమ్మడి గోదావరి జిల్లాల్లో గల ఐదు జిల్లాల పరిధిలో కేవలం రెండు పంచాయతీలకు ఈ అవార్డు దక్కింది.రావులపాలెంతో పాటు కాకినాడ జిల్లా గండేపల్లి గ్రామ పంచాయతీ ఈ అవార్డుకు ఎంపికైంది.