నెల రోజుల్లో డీఎస్సీ 2.0 నోటిఫికేషన్‌.. విద్యాశాఖ సమీక్షలో మంత్రి లోకేష్ ఆదేశం
అమరావతి, సూర్య ప్రతినిధి: ఆంధ్రప్రదేశ్‌లో ఖాళీగా ఉన్న ఉపాధ్యాయ పోస్టుల భర్తీ మరియు విద్యా రంగంలో సంస్కరణలపై విద్యాశాఖ అధికారులతో మంత్రి నారా లోకేష్ సుదీర్ఘ సమీక్షా సమావేశం నిర్వహించారు. రాష్ట్రంలో నిరుద్యోగ అభ్యర్థులకు తీపి కబురు అందిస్తూ, వచ్చే నెల రోజుల్లోనే డీఎస్సీ 2.0 (DSC 2.0) నోటిఫికేషన్‌ విడుదల చేసేలా చర్యలు వేగవంతం చేయాలని అధికారులను ఆదేశించారు. రాబోయే పదో తరగతి పబ్లిక్ పరీక్షల్లో అత్యుత్తమ ఫలితాలు సాధించడమే లక్ష్యంగా 'మిషన్ మార్చ్‌' కార్యక్రమాన్ని చేపట్టాలని సూచించారు. అలాగే పాఠశాలల్లో డ్రాప్‌ అవుట్స్‌ను పూర్తిగా అరికట్టేందుకు సింగపూర్ మంత్రి కే. షణ్ముగం ఇచ్చిన సలహాలను పరిగణనలోకి తీసుకోవాలని వెల్లడించారు. రాష్ట్రవ్యాప్తంగా 175 పాఠశాలలను 'లీప్ స్కూల్స్'గా తీర్చిదిద్దడంతో పాటు ప్రత్యేక అవసరాలు ఉన్న పిల్లల కోసం 125 ఆటిజం సెంటర్లను ప్రారంభించనున్నట్లు మంత్రి స్పష్టం చేశారు.
