తాను చనిపోయినా.. మరో వ్యక్తికి వెలుగులు నింపాడు

నారాయణపేట, సూర్యన్యూస్:  రోడ్డు ప్రమాదంలో కుమారుడిని కోల్పోయిన తల్లిదండ్రులు విషాదంలోనూ మానవత్వాన్ని చాటుకున్నారు. నారాయణపేట జిల్లా కోటకొండకు చెందిన వేపూరు నవీన్ కుమార్ భూత్పూర్ ఫ్లైఓవర్‌పై జరిగిన రోడ్డు ప్రమాదంలో తీవ్రంగా గాయపడి చికిత్స పొందుతూ మృతి చెందాడు. నవీన్ మృతితో కుటుంబ సభ్యులు తీవ్ర విషాదంలో మునిగిపోయారు. అయినప్పటికీ తమ కుమారుడి మరణం తర్వాత కూడా అతని ద్వారా మరొకరి జీవితంలో వెలుగు నింపాలని తల్లిదండ్రులు నిర్ణయించారు. వైద్యుల సూచన మేరకు నవీన్ నేత్రాలను నేత్రదానం చేశారు. నవీన్ నేత్రదానం ద్వారా చూపు కోల్పోయిన వారికి భవిష్యత్తులో చూపు లభించే అవకాశం ఏర్పడింది. కుమారుడిని కోల్పోయిన బాధలో ఉన్నప్పటికీ, అతని నేత్రాలను దానం చేయడానికి ముందుకు వచ్చిన తల్లిదండ్రుల నిర్ణయం పలువురికి ఆదర్శంగా నిలిచింది. ఈ సందర్భంగా నవీన్ తల్లిదండ్రులు మాట్లాడుతూ.. మా కుమారుడు మాకు దూరమైనా.. అతని కళ్ల ద్వారా మరొకరి జీవితంలో వెలుగు కనిపించాలి అనే సదుద్దేశంతో నిర్ణయం తీసుకున్నట్లు చెప్పారు.  దీంతో నవీన్ నేత్రదానం పట్ల స్థానికులు, బంధువులు, స్నేహితులు సానుభూతి వ్యక్తం చేస్తూ, తల్లిదండ్రుల మానవతా దృక్పథాన్ని ప్రశంసించారు.

-- రాజేష్ కుమార్, సూర్య రిపోర్టర్, నారాయణపేట.