‘ఎనర్జీ డ్రింక్’ లేబుల్ నిషేధంపై న్యాయపోరాటం

సూర్య కార్పొరేట్ బ్యూరో: అధిక కెఫిన్ కలిగిన పానీయాలపై ‘ఎనర్జీ డ్రింక్’ అనే పదాన్ని వాడకూడదంటూ భారత ఆహార భద్రత, ప్రమాణాల ప్రాధికార సంస్థ  జారీ చేసిన ఆదేశాలు బేవరేజ్ దిగ్గజాలకు మింగుడుపడటం లేదు. ఈ నిబంధనను తీవ్రంగా వ్యతిరేకిస్తూ ప్రముఖ బహుళజాతి సంస్థలు పెప్సికో , మాన్‌స్టర్ ఎనర్జీ  కోర్టు మెట్లెక్కాయి. ఎఫ్‌ఎస్‌ఎస్ఏఐ నిర్ణయం ఏకపక్షంగా ఉందని, ప్రపంచవ్యాప్తంగా అమల్లో ఉన్న వాణిజ్య ప్రమాణాలకు విరుద్ధంగా ఉందని పేర్కొంటూ న్యాయస్థానంలో పిటిషన్లు దాఖలు చేశాయి.

ఎఫ్‌ఎస్‌ఎస్ఏఐ ఆదేశాల వెనుక కారణం ఏమిటి?

కేంద్ర ఆహార నియంత్రణ సంస్థ ఎఫ్‌ఎస్‌ఎస్ఏఐ ఇటీవల జారీ చేసిన నిబంధనల ప్రకారం:వినియోగదారులను తప్పుదోవ పట్టించేలా ప్రచారం: ఎనర్జీ డ్రింక్’ అనే పదం ప్రజల్లో ఇవి పోషక విలువలు లేదా తక్షణ శారీరక శక్తిని అందించే పానీయాలనే తప్పుడు భావనను కలిగిస్తోందని ఎఫ్‌ఎస్‌ఎస్ఏఐ పేర్కొంది.
కెఫినేటెడ్ బెవరేజెస్’గానే పిలవాలి:అధిక మోతాదులో కెఫిన్ ఉండే ఉత్పత్తులను కేవలం ‘కెఫినేటెడ్ బెవరేజ్’  అని మాత్రమే లేబుల్ చేయాలని, ‘ఎనర్జీ డ్రింక్’ అనే పేరును బాటిళ్లు, డబ్బాలు, ప్రకటనల్లో పూర్తిగా నిషేధించాలని ఆదేశించింది.
ఆరోగ్య ముప్పుల హెచ్చరికలు:చిన్నారులు, గర్భిణులు, పాలిచ్చే తల్లులకు ఈ పానీయాలు సిఫార్సు చేయదగినవి కావనే స్పష్టమైన ముందస్తు హెచ్చరికలు కూడా లేబుల్‌పై ప్రముఖంగా ముద్రించాలని స్పష్టం చేసింది కంపెనీల అభ్యంతరాలు & కోర్టులో వాదనలు:ఎఫ్‌ఎస్‌ఎస్ఏఐ నిర్ణయాన్ని సవాలు చేస్తూ స్ట్రింగ్ (Sting) డ్రింక్ తయారీదారు పెప్సికోతో పాటు మాన్‌స్టర్ ఎనర్జీ సంస్థలు కోర్టును ఆశ్రయించాయి:
గ్లోబల్ బ్రాండింగ్ దెబ్బతింటుంది:
అంతర్జాతీయంగా ఎన్నో దశాబ్దాలుగా ఈ కేటగిరీ ఉత్పత్తులను ‘ఎనర్జీ డ్రింక్స్’ గానే గుర్తించి విక్రయిస్తున్నారని, భారత్‌లో అకస్మాత్తుగా ఈ లేబులింగ్‌ను నిషేధించడం వల్ల బ్రాండ్ గుర్తింపు, మార్కెట్ తీవ్రంగా దెబ్బతింటాయని కంపెనీలు వాదించాయి.
భారీ నష్టం వాటిల్లే అవకాశం:మార్కెట్లో ఇప్పటికే ఉన్న ప్యాకేజింగ్ మెటీరియల్స్, స్టాక్‌ను రీ-లేబుల్ చేయడం వల్ల కంపెనీలపై వందల కోట్ల అదనపు ఆర్థిక భారం పడుతుందని యాజమాన్యాలు తెలిపాయి.
*శాస్త్రీయ అధ్యయనం అవసరం:కెఫిన్ పరిమితులు నిర్దేశిత నిబంధనలకు లోబడే ఉన్నాయని, సరైన సంప్రదింపులు లేకుండా అమలు చేసిన ఈ ఉత్తర్వులపై స్టే విధించాలని కంపెనీలు కోర్టును అభ్యర్థించాయి.
దేశంలో వేగంగా వృద్ధి చెందుతున్న ఎనర్జీ డ్రింక్స్ మార్కెట్‌పై ఈ న్యాయపోరాటం తీవ్ర ప్రభావం చూపనుండటంతో, కోర్టు ఇచ్చే తీర్పుపై సర్వత్రా ఆసక్తి నెలకొంది.