- పామూరులో మీకోసం కార్యక్రమం నిర్వహించిన జిల్లా ఎస్పీ హర్షవర్ధన్ రాజు

- ప్రజల నుంచి 41 ఫిర్యాదులు స్వీకరణ

 పామూరు, మేజర్ న్యూస్ :  

ప్రజలకు మెరుగైన సేవలు అందించడంతో పాటు పోలీసు వ్యవస్థను ప్రజలకు మరింత చేరువ చేయడమే లక్ష్యంగా మీకోసం కార్యక్రమాన్ని నిర్వహిస్తున్నామని మార్కాపురం జిల్లా ఎస్పీ వి. హర్షవర్ధన్ రాజు తెలిపారు. సోమవారం పామూరు సర్కిల్ కార్యాలయ ప్రాంగణంలో మీకోసం నిర్వహించిన కార్యక్రమంలో ప్రజల నుంచి 41 ఫిర్యాదులను ఎస్పీ స్వీకరించారు. ఫిర్యాదుదారులతో ముఖాముఖి మాట్లాడి సమస్యలను తెలుసుకుని చట్టప్రకారం విచారణ జరిపి త్వరితగతిన న్యాయం అందించాలని సంబంధిత పోలీసు అధికారులను ఆదేశించారు.

కుటుంబ కలహాలు, చీటింగ్, భర్త, అత్తారింటి వేధింపులు, భూ ఆస్తి వివాదాలు తదితర సమస్యలపై ఫిర్యాదులు అందాయి. ఫిర్యాదులపై తీసుకున్న చర్యలపై నివేదిక అందించాలని అధికారులను ఎస్పీ ఆదేశించారు. మహిళలు, వృద్ధులు తమ సమస్యలను నేరుగా తెలియజేసి పరిష్కారం పొందేలా మీకోసం కార్యక్రమాన్ని సద్వినియోగం చేసుకున్నారని తెలిపారు. ప్రతి సోమవారం ప్రత్యామ్నాయంగా అన్ని సబ్‌డివిజన్ల పరిధిలో మీకోసం కార్యక్రమాన్ని నిర్వహిస్తామని జిల్లా పోలీసు కార్యాలయంలోనూ యథావిధిగా కొనసాగుతుందని చెప్పారు.

అదేవిధంగా వై.పాలెం సీఐ అజయ్‌కుమార్ ఆధ్వర్యంలో నిర్వహించిన మీకోసం కార్యక్రమానికి 36 ఫిర్యాదులు అందాయన్నారు. కార్యక్రమంలో కనిగిరి ఇన్‌చార్జి డీఎస్పీ పి.శ్రీధర్, పామూరు సీఐ వినోద్‌కుమార్, పొదిలి సీఐ రాజేష్‌కుమార్, కనిగిరి సీఐ శ్రీనివాసరావు, సమస్యల పరిష్కార వేదిక ఎస్సై యాస్మిన్, సిబ్బంది పాల్గొన్నారు.