ప్రజలకు నాణ్యమైన వైద్యం అందించాలి : వైద్యులకు ఎమ్మెల్యే మహమ్మద్ షాజహాన్ బాషా ఆదేశం
మదనపల్లె,మేజర్ న్యూస్ : అన్నమయ్య జిల్లా కేంద్రం,మదనపల్లెలోని జిల్లా ప్రభుత్వ ఆసుపత్రిని గురువారం ఎమ్మెల్యే షాజహాన్ బాషా ఆకస్మికంగా సందర్శించి తనిఖీ నిర్వహించారు.ఈ సందర్భంగా ఆసుపత్రిలో రోగుల కు అందుతున్న వైద్యసేవలు,అందుబాటులో ఉన్న వైద్యసదుపాయాలు,ఆసుపత్రి పరిసరాల పరిశుభ్రతను ఆయన స్వయంగా పరిశీలించారు.చికిత్స పొందుతున్న రోగులు,వారి కుటుంబ సభ్యులతో నేరుగా మాట్లాడి వైద్య సేవల నాణ్యత,వైద్యులు,నర్సులు,ఇతర సిబ్బంది పనితీరు,వారి ప్రవర్తనపై వివరాలు అడిగి తెలుసుకున్నారు.అనంతరం సంబంధిత వైద్యాధికారులు,సిబ్బందితో మాట్లాడి ప్రభుత్వ ఆసుపత్రికి వచ్చే ప్రతి రోగికి మెరుగైన వైద్య సేవలు అందించాలని సూచించారు.ఆసుపత్రిలో పరిశుభ్రతను నిరంతరం పాటించాలని,విధుల పట్ల నిర్లక్ష్యం వహించకుండా సమయ పాలనతో పనిచేస్తూ ప్రజలకు అందుబాటులో ఉండాలని ఆదేశించారు.ప్రజలకు నాణ్యమైన వైద్యం అందించడమే లక్ష్యంగా ప్రభుత్వ ఆసుపత్రు ల పనితీరును ఎప్పటికప్పుడు పర్యవేక్షిస్తున్నామని,ప్రజారోగ్యానికి అత్యంత ప్రాధాన్యతనిస్తూ ఆకస్మిక తనిఖీలు కొనసాగిస్తామని ఎమ్మెల్యే పేర్కొన్నారు.ఈ కార్యక్రమంలో ఆర్ఎంఓ రాధికతోపాటు సిబ్బంది,కూటమి పార్టీల నాయకులు పాల్గొన్నారు.
రిపోర్టర్ : కే.ఈశ్వర్ రెడ్డి,మదనపల్లి నియోజకవర్గం ఇంచార్జి
