ప్రజాసేవే పరమావధిగా జీవితాన్ని అంకితం చేసిన మహానేత ఎర్రన్నాయుడు

టీడీపీ కేంద్ర కార్యాలయంలో ఘనంగా ఎర్రన్నాయుడు వర్ధంతి చిత్రపటానికి పూలమాలలు వేసి ఘన నివాళులర్పించిన పార్టీ నేతలు

సూర్య స్టేట్ బ్యూరో, అమరావతి: ప్రజాసేవకు, తెలుగుదేశం పార్టీ సిద్ధాంతాలకు తన జీవితాన్ని అంకితం చేసిన మహానేత ఎర్రన్నాయుడు అని టీడీపీ నాయకులు కొనియాడారు. ఆయన వర్ధంతిని పురస్కరించుకుని మంగళగిరిలోని టీడీపీ కేంద్ర కార్యాలయంలో ఘనంగా నివాళులర్పించారు. ఈ సందర్భంగా ఎర్రన్నాయుడు చిత్రపటానికి పూలమాలలు వేసి ఘనంగా అంజలి ఘటించారు. ప్రజా సమస్యల పరిష్కారానికి నిరంతరం కృషి చేసిన నాయకుడిగా, పార్టీ బలోపేతానికి విశేష సేవలందించిన నేతగా ఆయన సేవలను స్మరించుకున్నారు. ముఖ్యంగా ఉత్తరాంధ్ర అభివృద్ధికి, ప్రజా సంక్షేమానికి ఎర్రన్నాయుడు చేసిన కృషి చిరస్మరణీయమని పేర్కొన్నారు. ప్రజలతో మమేకమై, వారి సమస్యలను తన సమస్యలుగా భావించి పనిచేసిన ఆయన సేవా స్ఫూర్తి నేటి తరానికి ఆదర్శమని కొనియాడారు. ఈ కార్యక్రమంలో శ్రీశైలం దేవస్థానం బోర్డు సభ్యులు ఏ.వి. రమణ, మీడియా కోఆర్డినేటర్ దారపనేని నరేంద్ర, అన్నవరం దేవస్థానం బోర్డు సభ్యులు రావిపాటి సత్యనారాయణ, పార్టీ నాయకులు పర్చూరి కృష్ణ తదితరులు పాల్గొన్నారు.