ప్రజాక్షేత్రంలో గెలిచారు... ప్రజల గుండెల్లో నిలవండి!

పెందుర్తి, సూర్య : పరిషత్ (జెడ్పిటిసి, ఎంపిటిసి) ఎన్నికలలో ఘన విజయం సాధించిన ఎన్డీఏ కూటమి అభ్యర్థులు ఆదివారం పెందుర్తి శాసనసభ్యులు, జనసేన పార్టీ ఉమ్మడి విశాఖపట్నం రూరల్ జిల్లా అధ్యక్షులు శ్రీ పంచకర్ల రమేష్ బాబు ని మర్యాదపూర్వకంగా కలిశారు.

ఈ సందర్భంగా సుజాతనగర్‌లోని ఎమ్మెల్యే క్యాంపు కార్యాలయంలో  ఆదివారం నాడు పెందుర్తి, పరవాడ, సబ్బవరం మండలాలకు చెందిన విజేతలు ఎమ్మెల్యే రమేష్ బాబు కి ప్రత్యేక కృతజ్ఞతలు తెలియజేశారు. ఎన్నికలలో పోటీ చేసే అవకాశం కల్పించడంతో పాటు, విజయం సాధించే వరకు అన్ని విధాలా సహాయ సహకారాలు అందించినందుకు వారు ఎమ్మెల్యేకు హృదయపూర్వక నమస్సుమాంజలు తెలియజేసుకున్నారు. అనంతరం, విజయం సాధించిన ప్రజాప్రతినిధులను ఎమ్మెల్యే పంచకర్ల రమేష్ బాబు శాలువాలతో ఘనంగా సత్కరించి అభినందనలు అందించారు.

ఈ సందర్భంగా ఎమ్మెల్యే రమేష్ బాబు మాట్లాడుతూ... "మిమ్మల్ని నమ్మి గెలిపించిన ప్రజలకు ఎల్లప్పుడూ తోడు నీడగా ఉండాలి. మీ మీ ప్రాంతాలలో అభివృద్ధి పనులు చేపట్టి ప్రజల హృదయాల్లో శాశ్వత స్థానం సంపాదించుకోవాలి. ఈ విజయంలో కీలక పాత్ర పోషించిన ఎన్డీఏ కూటమి నాయకులు, కార్యకర్తలకు ఎల్లవేళలా కృతజ్ఞతతో ఉండాలి" అని ఉద్బోధించారు. నియోజకవర్గంలోని మండలాల సమగ్ర అభివృద్ధికి ప్రభుత్వం నుండి తగిన నిధులు తీసుకువచ్చి పూర్తి అండగా ఉంటానని జెడ్పిటిసి, ఎంపిటిసి సభ్యులకు ఆయన హామీ ఇచ్చారు.