పోలింగ్కు సర్వం సిద్ధం

డుంబ్రిగుడ, అక్టోబర్ 04, మేజర్ న్యూస్:మండలంలో జడ్పీటీసీ, ఎంపీటీసీ ఎన్నికలకు పూర్తిస్థాయిలో ఏర్పాట్లు పూర్తి చేసినట్లు మండల ఎన్నికల రిటర్నింగ్ అధికారి రహీమ్ తెలిపారు. మండల వ్యాప్తంగా ఉన్న 14 స్థానాలకు గానూ 52 పోలింగ్ కేంద్రాలను ఏర్పాటు చేశామని, ప్రతి కేంద్రానికి ఆరుగురు చొప్పున సిబ్బందిని నియమించినట్లు పేర్కొన్నారు. అత్యవసర సేవలకుగానూ మరో 20 మంది సిబ్బందిని రిజర్వ్‌లో ఉంచినట్లు వెల్లడించారు.
నేడు జరగనున్న పోలింగ్ సరళిపై గంటగంటకూ సమాచారాన్ని సేకరించడానికి మండల పరిషత్ కార్యాలయ సీనియర్ అసిస్టెంట్‌ను ప్రత్యేకంగా నియమించినట్లు తెలిపారు. పోలింగ్ కేంద్రాల వద్ద ఎలాంటి అవాంఛనీయ సంఘటనలూ జరగకుండా గట్టి పోలీస్ బందోబస్తు ఏర్పాటు చేసినట్లు ఆయన పేర్కొన్నారు.