పోలీసులకు మూడు నూతన స్నిఫర్ డాగ్స్
విజయవాడ క్రైం, మేజర్ న్యూస్ : ఎన్.టి.ఆర్. పోలీస్ కమిషనరేట్‌కు రెండు, ఈగల్ బృందానికి ఒక నూతన స్నిఫర్ డాగ్ కేటాయించారు. సుమారు ఏడాది పాటు ప్రత్యేక శిక్షణ పూర్తి చేసుకున్న మూడు కుక్కలు పోలీస్ కమిషనరేట్‌కు చేరుకున్నాయి. వీటిలో నైనా అనే డచ్ షెపర్డ్ జాతి ఆడ కుక్క పేలుడు పదార్థాల గుర్తింపు, ఆనవాళ్లను అనుసరించడంలో శిక్షణ పొందింది. దీనికి హెడ్ కానిస్టేబుల్ పి.నాగరాజు హ్యాండ్లర్‌గా ఉన్నారు. శిక్షణా కేంద్రంలో జరిగిన రాష్ట్రస్థాయి పోటీల్లో నైనా రెండో స్థానం సాధించింది. లక్కీ అనే బెల్జియన్ మెలనోయిస్ జాతి ఆడ కుక్క మాదకద్రవ్యాల గుర్తింపు, ఆనవాళ్లను అనుసరించడంలో శిక్షణ పొందగా, దీనికి కానిస్టేబుల్ బి.ఆర్.బి.రాజు, హెడ్ కానిస్టేబుల్ ఎన్.రామరాజు హ్యాండ్లర్లుగా ఉన్నారు. రాడో అనే బెల్జియన్ మెలనోయిస్ జాతి మగ కుక్కకు కానిస్టేబుల్ జి.అప్పలనాయుడు హ్యాండ్లర్‌గా వ్యవహరిస్తుండగా, మాదకద్రవ్యాల గుర్తింపులో శిక్షణ పొందిన దీనిని ఈగల్ బృందానికి కేటాయించారు. ఈ సందర్భంగా అధికారులు పోలీస్ కమిషనర్ ఎస్.వి.రాజశేఖర బాబును కలిసి శిక్షణ వివరాలను తెలిపారు. కార్యక్రమంలో అడ్మిన్ డీసీపీ కె.జి.వి.సరిత, డీసీపీ లక్ష్మీనారాయణ, ఇతర అధికారులు పాల్గొన్నారు.
✍️ ప్రేమ్ రాజ్, విజయవాడ.
