పోలీస్ అమరవీరుల వారోత్సవాల క్యాండిల్ ర్యాలీ

పోలీస్ అమరవీరుల సంస్మరణ వారోత్సవాల్లో భాగంగా ఆత్మకూరులో ఘనంగా క్యాండిల్ ర్యాలీ, మానవహారం

దేశ భద్రత, ప్రజల రక్షణ కోసం ప్రాణత్యాగం చేసిన పోలీస్ అమరవీరుల సేవలు చిరస్మరణీయం
– ఆత్మకూరు డీఎస్పీ టీ. వెంకటేశులు

ఆత్మకూరు, మేజర్ న్యూస్, సోమా వెంకటసుబ్బయ్య :
పోలీస్ అమరవీరుల దినోత్సవాన్ని పురస్కరించుకొని నిర్వహిస్తున్న పోలీస్ అమరవీరుల సంస్మరణ వారోత్సవాల్లో భాగంగా, గౌరవ జిల్లా ఎస్పీ అజిత వేజెండ్ల ఆదేశాల మేరకు ఆత్మకూరు సబ్ డివిజన్ పరిధిలో డీఎస్పీ టీ. వెంకటేశులు  ఆధ్వర్యంలో సుమారు 200 మందితో ఆదివారం క్యాండిల్ ర్యాలీ మరియు మానవహారం కార్యక్రమాన్ని ఘనంగా నిర్వహించారు.
ఈ సందర్భంగా ఆత్మకూరు పోలీస్ స్టేషన్ వద్ద డీఎస్పీ టీ. వెంకటేశులు  క్యాండిల్ ర్యాలీని ప్రారంభించారు. పోలీస్ అమరవీరుల త్యాగాలను స్మరించుకుంటూ, అమరవీరులకు నివాళులు అర్పించే నినాదాలతో పోలీస్ అధికారులు, సిబ్బంది, విద్యార్థులు, ప్రజా సంఘాల ప్రతినిధులు క్యాండిల్స్ చేతబట్టి ఆత్మకూరు పోలీస్ స్టేషన్ నుంచి బీఎస్‌ఆర్ సెంటర్ వరకు ర్యాలీ నిర్వహించారు.
అనంతరం బీఎస్‌ఆర్ సెంటర్ వద్ద సుమారు 200 మంది విద్యార్థులు, పోలీస్ సిబ్బంది మరియు ప్రజా సంఘాల ప్రతినిధులతో మానవహారం ఏర్పాటు చేసి, దేశ రక్షణలోనూ, ప్రజల శాంతిభద్రతల పరిరక్షణలోనూ విధి నిర్వహణలో ప్రాణాలర్పించిన పోలీస్ అమరవీరులకు ఘనంగా నివాళులర్పించారు.
ఈ సందర్భంగా ఆత్మకూరు డీఎస్పీ టీ. వెంకటేశులు మాట్లాడుతూ, దేశ భద్రతను కాపాడటంలో, ప్రజల ప్రాణాలు మరియు ఆస్తుల రక్షణలో, శాంతిభద్రతల పరిరక్షణలో పోలీస్ శాఖ నిరంతరం కీలక పాత్ర పోషిస్తోందని తెలిపారు. సమాజంలో శాంతి, భద్రతలను నెలకొల్పేందుకు తమ ప్రాణాలను సైతం లెక్కచేయకుండా విధులు నిర్వర్తిస్తూ ప్రాణత్యాగం చేసిన పోలీస్ అమరవీరుల సేవలు చిరస్మరణీయమని పేర్కొన్నారు.
పోలీస్ అమరవీరుల త్యాగాల ఫలితంగానే ప్రజలు ప్రశాంతమైన, సురక్షితమైన వాతావరణంలో జీవించగలుగుతున్నారని, వారి త్యాగాలను ప్రతి ఒక్కరూ స్మరించుకోవాల్సిన అవసరం ఉందని తెలిపారు. పోలీస్ అమరవీరుల కుటుంబ సభ్యులు చేసిన త్యాగాలు కూడా ఎంతో గొప్పవని, వారి కుటుంబాలకు సమాజం ఎల్లప్పుడూ అండగా నిలవాలని పిలుపునిచ్చారు.
అలాగే ప్రస్తుతం దేశవ్యాప్తంగా అంతర్గత భద్రత, శాంతిభద్రతల పరిరక్షణ, నేరాల నియంత్రణ, ప్రజల రక్షణ, విపత్తుల సమయంలో సహాయక చర్యలు మరియు వివిధ భద్రతా విధుల్లో నిరంతరం సేవలందిస్తున్న పోలీస్ సిబ్బంది కృషిని గుర్తించాలని పేర్కొన్నారు. పోలీస్ అమరవీరుల త్యాగాలను ఆదర్శంగా తీసుకొని ప్రతి పోలీస్ అధికారి, సిబ్బంది అంకితభావంతో విధులు నిర్వర్తించాలని సూచించారు.
ఈ సందర్భంగా ఆత్మకూరు సీఐ జి. గంగాధర్ రావు  మాట్లాడుతూ, దేశ భద్రత, ప్రజల రక్షణ కోసం విధి నిర్వహణలో ప్రాణాలర్పించిన పోలీస్ అమరవీరుల త్యాగాలు వెలకట్టలేనివని తెలిపారు. సమాజంలో శాంతిభద్రతలను కాపాడేందుకు పోలీసులు అనేక క్లిష్ట పరిస్థితుల్లో, ప్రాణాపాయ పరిస్థితుల్లో సైతం విధులు నిర్వర్తిస్తున్నారని పేర్కొన్నారు.

ప్రజల భద్రత కోసం తమ ప్రాణాలను త్యాగం చేసిన అమరవీరులకు నివాళులు అర్పించడంతో పాటు, వారి కుటుంబ సభ్యుల త్యాగాలను కూడా గుర్తించి గౌరవించాల్సిన బాధ్యత ప్రతి ఒక్కరిపై ఉందని తెలిపారు. యువత, విద్యార్థులు పోలీస్ అమరవీరుల దేశభక్తి, సేవాభావం, క్రమశిక్షణ మరియు త్యాగనిరతిని ఆదర్శంగా తీసుకొని సమాజానికి ఉపయోగపడే విధంగా ఎదగాలని సూచించారు.

ఈ కార్యక్రమంలో ఆత్మకూరు డీఎస్పీ టీ. వెంకటేశులు, సీఐ జి. గంగాధర్ రావు, ఎస్‌ఐ జంపని కుమార్, కాసా శ్రీనివాసరెడ్డి, ఎన్జీవో సంఘాల అధ్యక్షుడు వాగాల శ్రీహరి, ఆత్మకూరు సబ్ డివిజన్ పరిధిలోని పోలీస్ అధికారులు, పోలీస్ సిబ్బంది, వివిధ ప్రజా సంఘాల ప్రతినిధులు మరియు విద్యార్థులు పాల్గొన్నారు.

ఈ సందర్భంగా పోలీస్ అమరవీరుల త్యాగాలను స్మరించుకుంటూ క్యాండిల్ ర్యాలీ, మానవహారం నిర్వహించి, దేశం కోసం మరియు ప్రజల రక్షణ కోసం ప్రాణాలర్పించిన అమరవీరులకు ఘనంగా నివాళులర్పించారు.