పొదలకూరులో పోలింగ్ కేంద్రం వద్ద వైసీపీ–టీడీపీ వర్గాల ఘర్షణ

పొదలకూరు,  మేజర్ న్యూస్ :   సర్వేపల్లి నియోజకవర్గంలోని పొదలకూరు మండలంలో పరిషత్ ఎన్నికల పోలింగ్ సందర్భంగా తీవ్ర ఉద్రిక్తత చోటుచేసుకుంది. పొదలకూరులోని బాలుర ఉన్నత పాఠశాల పోలింగ్ కేంద్రం వద్ద జెడ్పీటీసీ, ఎంపీటీసీ బిట్‌-2కు సంబంధించి వైసీపీ, టీడీపీ వర్గాల మధ్య ఘర్షణ వాతావరణం నెలకొంది. పోలింగ్ ఏజెంట్ల నియామకానికి సంబంధించి ఇరుపార్టీల అభ్యర్థులు, కార్యకర్తల మధ్య మొదలైన వాగ్వాదం కాస్తా తోపులాటకు దారితీసింది. ఒక దశలో పోలీసులు సైతం పరిస్థితిని అదుపు చేయలేని పరిస్థితి ఏర్పడింది. సమాచారం అందుకున్న పొదలకూరు సీఐ అదనపు పోలీసు సిబ్బందితో సంఘటనా స్థలానికి చేరుకుని గుంపులుగా చేరిన నాయకులు, కార్యకర్తలను చెదరగొట్టారు. దీంతో సుమారు అరగంట పాటు నిలిచిపోయిన పోలింగ్ ప్రక్రియను పోలీసులు తిరిగి ప్రారంభించేలా చర్యలు తీసుకున్నారు.కాగా, పొదలకూరును అధికారులు సమస్యాత్మక ప్రాంతంగా గుర్తించారు. ఈ నేపథ్యంలో ఎన్నికల ఏర్పాట్లు, భద్రతా చర్యలను జిల్లా ఎస్పీ అజిత వేజెండ్ల గురువారం పరిశీలించారు. తాజా ఘర్షణ నేపథ్యంలో కొద్దిసేపట్లో జిల్లా కలెక్టర్ సైతం పోలింగ్ కేంద్రాన్ని సందర్శించనున్నట్లు సమాచారం. ఎన్నికల ప్రక్రియ ప్రశాంతంగా జరిగేలా పోలీసులు అదనపు బందోబస్తు ఏర్పాటు చేశారు.