బుచ్చిలో ప్రశాంతంగా స్థానిక సంస్థల ఎన్నికలు

బుచ్చిరెడ్డిపాలెం, మేజర్ న్యూస్  :  స్థానిక సంస్థల ఎన్నికలలో భాగంగా బుచ్చిరెడ్డిపాలెం లో గురువారం జరిగిన ఎంపిటిసి, జడ్ పిటిసి ఎన్నికలలో ఎలాంటి అవాంఛనీయ సంఘటనలు జరగకుండా ప్రశాంతంగా ముగిసినట్లు అధికారులు తెలిపారు. మండలంలో మొత్తం 34,670 మంది ఓటర్లు ఉండగా వారిలో పురుషులు 16, 691 మంది, స్త్రీలు 17,979 మంది ఉన్నారు మొత్తం 11 ఎంపిటిసి స్థానాలు, ఒక జడ్ పిటిసి స్థానం ఉండగా వాటిలో జడ్ పి టి సి స్థానం  ఏకగ్రీవం కాగా, అదేవిధంగా 11 ఎంపిటిసి స్థానాలలో రెండు  ఏకగ్రీవం అవడంతో మిగిలిన 9 స్థానాలకు గురువారం ఎన్నికలు నిర్వహించారు. ఈ ఎన్నికలలో  మొత్తం 22 మంది అభ్యర్థులు  బరిలో నిలిచారు. 39 పోలింగ్ కేంద్రాల్లో ఈ ఎన్నికల ప్రక్రియ నిర్వహించారు. ఉదయం ఏడు గంటల నుండి సాయంత్రం ఐదు గంటల వరకు జరిగిన పోలింగ్ లో ఎలాంటి అవాంఛనీయ సంఘటనలు జరగకుండా, అదేవిధంగా రీ పోలింగ్ కుతావు లేకుండా పోలీసులు గట్టి బందోబస్తు ఏర్పాటు చేశారు. పోలింగ్ సందర్భంగా ఎన్నికల రిటర్నింగ్ అధికారి సోమ్లా నాయక్  స్థానిక తహసీల్దార్ అంబటి వెంకటేశ్వర్లు తో కలిసి అన్ని పోలింగ్ కేంద్రాలను పరిశీలించారు. ఎంపిడిఓ ఎస్ రంతులయ్య మండలంలోని పెనుబల్లి, కాలయకాగొల్లు తదితర పోలింగ్ కేంద్రాలను పరిశీలించారు. మొత్తం మీద 65 శాతం పోలింగ్ జరిగినట్లు అధికారులు వెల్లడించారు. కాగా ఈ ఎన్నికల లెక్కింపు ఈనెల 7వ తేది శనివారం నిర్వహించనున్నారు.