ఎన్నికల ఎఫెక్ట్‌.. ప్రయాణికులకు పాట్లు!
రాపూరు, మేజర్ న్యూస్ : స్థానిక సంస్థల ఎన్నికల ప్రభావం ప్రజా రవాణాపై పడటంతో రాపూరు ఆర్టీసీ బస్టాండ్‌లో ప్రయాణికులు తీవ్ర ఇబ్బందులు ఎదుర్కొన్నారు. గురువారం సకాలంలో బస్సు సర్వీసులు అందుబాటులో లేకపోవడంతో బస్టాండ్ ప్రయాణికులు లేక బోసిపోయింది. తమ గమ్యస్థానాలకు చేరుకోవాల్సిన ప్రయాణికులు గంటల తరబడి బస్సుల కోసం నిరీక్షించాల్సిన పరిస్థితి నెలకొంది. ఎన్నికల విధుల నిర్వహణ కోసం బస్సులను వినియోగించడంతో సాధారణ ప్రయాణికులకు సరిపడా సర్వీసులు అందుబాటులో లేకుండా పోయాయని ప్రయాణికులు అసహనం వ్యక్తం చేశారు. అత్యవసర పనులపై వెళ్లాల్సిన వారు సైతం సమయానికి గమ్యస్థానాలకు చేరుకోలేక ఇబ్బందులు పడ్డారు. ఎన్నికల విధులకు బస్సులను కేటాయించే క్రమంలో సాధారణ ప్రయాణికుల అవసరాలను కూడా పరిగణనలోకి తీసుకోవాల్సిన బాధ్యత అధికారులపై ఉందని పలువురు అభిప్రాయపడ్డారు. ప్రజా రవాణా వ్యవస్థకు అంతరాయం కలగకుండా ప్రత్యామ్నాయ ఏర్పాట్లు చేయాలని, బస్సు సర్వీసులను పునరుద్ధరించి ప్రయాణికుల ఇబ్బందులను తొలగించాలని కోరుతున్నారు. ఎన్నికల విధులకు బస్సులు సరిపోతున్నాయా..? ప్రయాణికుల అవసరాలు పట్టించుకునేది ఎవరు..? అంటూ ప్రయాణికులు ప్రశ్నిస్తున్నారు.
