పెడనలో కూటమి అభ్యర్థుల విజయానికి బుద్ధప్రసాద్ ప్రచారం

పెడన, మేజర్ న్యూస్: జనసేన పార్టీ రాష్ట్ర నాయకత్వం ఆదేశాల మేరకు అవనిగడ్డ ఎమ్మెల్యే మండలి బుద్ధప్రసాద్, డీసీఎంఎస్ చైర్మన్ బండి రామకృష్ణ, పెడన ఎమ్మెల్యే కాగిత కృష్ణప్రసాద్‌తో కలిసి 17వ వార్డులో ఎన్నికల ప్రచారం నిర్వహించారు. టీడీపీ, బీజేపీ బలపరిచిన జనసేన మున్సిపల్ చైర్మన్ అభ్యర్థి బళ్ళ జ్ఞానలింగ జ్యోత్స్న రాణి, వార్డు అభ్యర్థి సయ్యద్ ఫర్హాలను గెలిపించాలని కోరుతూ ఇంటింటికీ వెళ్లి ఓట్లు అభ్యర్థించారు. ఈ సందర్భంగా మండలి బుద్ధప్రసాద్ మాట్లాడుతూ వైసీపీ పాలనలో స్థానిక సంస్థలు నిర్వీర్యమయ్యాయని, అసెంబ్లీలో అనుచిత భాషతో రాజకీయ విలువలను దిగజార్చారని విమర్శించారు. కూటమి ప్రభుత్వంలో ప్రధాని నరేంద్ర మోదీ సహకారంతో ముఖ్యమంత్రి చంద్రబాబు మున్సిపాలిటీలు, కార్పొరేషన్ల సమగ్ర అభివృద్ధికి కృషి చేస్తున్నారని, ఉప ముఖ్యమంత్రి పవన్ కళ్యాణ్ గ్రామాల అభివృద్ధికి ప్రాధాన్యత ఇస్తున్నారని తెలిపారు. కూటమి ప్రభుత్వం చేపడుతున్న అభివృద్ధి కార్యక్రమాలను గమనించి ఓటర్లు కూటమి అభ్యర్థులను అత్యధిక మెజారిటీతో గెలిపించాలని, తద్వారా మరిన్ని అభివృద్ధి పనులకు ప్రోత్సాహం అందించాలని పిలుపునిచ్చారు.

స్టాఫ్ రిపోర్టర్: ✍️ ప్రేమ్ రాజ్, పెడన నియోజకవర్గం, కృష్ణాజిల్లా.