ఉయ్యూరులో అభివృద్ధి పనులే కీలకం

ఉయ్యూరు, మేజర్ న్యూస్: ఉయ్యూరు మున్సిపాలిటీ సమగ్ర అభివృద్ధి, ప్రజా సంక్షేమమే లక్ష్యంగా 7వ వార్డులో కూటమి మున్సిపల్ చైర్మన్ అభ్యర్థి చెదుర్తిపాటి ప్రవీణ్ కుమార్, కౌన్సిలర్ అభ్యర్థి మెరుగు చిన్న కోటయ్య విజయాన్ని కాంక్షిస్తూ కూటమి నాయకులు, కార్యకర్తలతో కలిసి విస్తృతంగా ఎన్నికల ప్రచారం నిర్వహించారు. ఈ సందర్భంగా ప్రజలను నేరుగా కలుసుకుని వారి సమస్యలను తెలుసుకున్నారు. రహదారులు, డ్రైనేజీ, తాగునీరు వంటి మౌలిక సదుపాయాలను మెరుగుపరచడంతో పాటు అర్హులైన ప్రతి ఒక్కరికీ సంక్షేమ పథకాలు అందేలా కృషి చేస్తామని తెలిపారు. గత పాలనలో పరిష్కారం కాని సమస్యలపై ప్రజలకు ప్రశ్నించే హక్కు ఉందని, ప్రజాప్రతినిధులు తమ పనితీరుకు సమాధానం చెప్పాలని పేర్కొన్నారు. ఎన్నికల సమయంలో ఇచ్చే హామీల కంటే క్షేత్రస్థాయిలో కనిపించే అభివృద్ధి పనులకే ప్రాధాన్యత ఇవ్వాలని, ప్రజల సమస్యలకు పరిష్కారం చూపుతూ జవాబుదారీతనంతో కూడిన పాలన అందించడమే కూటమి లక్ష్యమని తెలిపారు. ఉయ్యూరు అభివృద్ధికి కట్టుబడి ఉన్న కూటమి అభ్యర్థులకు ప్రజలు మద్దతు ఇవ్వాలని కోరారు.

స్టాఫ్ రిపోర్టర్: ✍️ ప్రేమ్ రాజ్, పెనమలూరు నియోజకవర్గం, కృష్ణాజిల్లా.