పరిషత్ ఎన్నికల సరళిని కమాండ్ కంట్రోల్ రూమ్ నుంచి పర్యవేక్షించిన జేసీ

విశాఖపట్నం, సూర్య :  జిల్లాలోని భీమిలి, పద్మనాభం, ఆనందపురం, పెందుర్తి మండలాల పరిధిలో నిర్వహించిన జెడ్పీటీసీ, ఎంపీటీసీ ఎన్నికల ప్రక్రియను జాయింట్ కలెక్టర్ గొబ్బిళ్ల విద్యాధరి జిల్లా పరిషత్ కార్యాలయంలో ఏర్పాటు చేసిన కమాండ్ కంట్రోల్ రూమ్ నుంచి నిరంతరం పర్యవేక్షించారు. క్షేత్రస్థాయిలో పోలింగ్ సరళి, ఎన్నికల నిర్వహణ, పరిస్థితులపై ఎప్పటికప్పుడు సమీక్షిస్తూ సంబంధిత అధికారులకు తగిన ఆదేశాలు జారీ చేశారు. జెడ్పీ సీఈవో నారాయణమూర్తి, డిప్యూటీ సీఈవో సందీప్, ట్రైనీ డిప్యూటీ కలెక్టర్ యోగిత తదితర అధికారులు కంట్రోల్ రూమ్ నుంచి క్షేత్రస్థాయి అధికారులతో సమన్వయం చేసుకుంటూ పోలింగ్ కేంద్రాల పరిస్థితులు, పోలింగ్ పురోగతిపై ఎప్పటికప్పుడు నివేదికలు అందించారు. క్షేత్రస్థాయి అధికారులను అప్రమత్తం చేస్తూ ఎన్నికల నిర్వహణను నిరంతరం పర్యవేక్షించారు. ఎన్నికల ప్రక్రియలో ఎలాంటి అవాంఛనీయ ఘటనలకు తావులేకుండా, ప్రశాంత వాతావరణంలో, పూర్తి పారదర్శకతతో పోలింగ్ నిర్వహించాలని జాయింట్ కలెక్టర్ అధికారులకు సూచించారు. ఓటర్లు ఎలాంటి ఇబ్బందులు లేకుండా తమ ఓటు హక్కును వినియోగించుకునేలా అవసరమైన చర్యలు తీసుకోవాలని, ఎన్నికల నిబంధనలను అమలు చేస్తూ పోలింగ్ పూర్తయ్యే వరకు అప్రమత్తంగా విధులు నిర్వహించాలని ఆదేశించారు.