పదో తరగతి విద్యార్థులకు ఉచితంగా 'గణిత దీప్తి' పుస్తకాల పంపిణీ

​నెల్లిమర్ల, సూర్య: జరజాపుపేట జడ్పీ ఉన్నత పాఠశాలలో పదో తరగతి విద్యార్థుల ఉజ్వల భవిష్యత్తును దృష్టిలో ఉంచుకొని గణిత ఉపాధ్యాయుడు శివుకు బంగారయ్య మరోసారి తన ఉదార స్వభావాన్ని చాటుకున్నారు. గురువారం స్థానిక పాఠశాలలో ఏర్పాటు చేసిన కార్యక్రమంలో, ప్రతి ఏటా మాదిరిగానే ఈ ఏడాది కూడా పదో తరగతి విద్యార్థులందరికీ ఉచితంగా 'గణిత దీప్తి' పుస్తకాలను అందజేశారు. ​ఈ కార్యక్రమానికి ఎంఈవో-1 యు.ఎస్.ఎన్. మూర్తి, ఎంఈవో-2 సిద్ధాంతం తినాధరావు ముఖ్య అతిథులుగా విచ్చేసి, తమ చేతుల మీదుగా విద్యార్థులకు పుస్తకాలను పంపిణీ చేశారు. ​ఈ సందర్భంగా వారు మాట్లాడుతూ.. పదో తరగతి విద్యార్థులు గణిత సబ్జెక్ట్‌లో మంచి ప్రతిభ కనబరిచి, పరీక్షల్లో అత్యుత్తమ ఫలితాలు సాధించాలనే సత్సంకల్పంతో బంగారయ్య ఈ పుస్తకాలను అందజేయడం ఎంతో అభినందనీయమన్నారు. విద్యార్థులకు విద్యాపరంగా నిరంతరం తోడ్పాటునందిస్తూ, వారి విజయానికి తన వంతు సహకారం అందిస్తున్న ఆయన సేవలు ఇతరులకు ఆదర్శప్రాయమని కొనియాడారు. ​విద్యార్థుల అభ్యున్నతి కోసం ప్రతి ఏటా స్వచ్ఛందంగా పుస్తకాలను పంపిణీ చేస్తున్న శివుకు బంగారయ్య సేవలను పాఠశాల ప్రధానోపాధ్యాయులు, తోటి ఉపాధ్యాయులు ప్రత్యేకంగా అభినందించారు. ఈ కార్యక్రమంలో పాఠశాల హెచ్‌ఎం, పలువురు ఉపాధ్యాయులు తదితరులు పాల్గొన్నారు.