పచ్చని పల్లెలకు డేటా సెంటర్ల ముప్పు!

భోగాపురం, సూర్య: పచ్చని పంట పొలాలతో కళకళలాడే భోగాపురం ప్రాంతంలో డేటా సెంటర్ల ఏర్పాటుతో పర్యావరణానికి తీవ్ర ముప్పు వాటిల్లే ప్రమాదం ఉందని సీపీఎం జిల్లా కార్యవర్గ సభ్యుడు టి.వి. రమణ ఆవేదన వ్యక్తం చేశారు. ఉద్యోగాలు, ఉపాధి కల్పిస్తామనే హామీల సంగతేమో గానీ, డేటా సెంటర్ల వల్ల కలిగే పర్యావరణ నష్టం, భవిష్యత్తులో తలెత్తే నీటి సమస్యలపై ప్రభుత్వం సమాధానం చెప్పాలని డిమాండ్ చేశారు. డేటా సెంటర్ల ఏర్పాటుకు సంబంధించి ప్రభుత్వం ఇప్పటికే అనుమతుల నోటిఫికేషన్ జారీ చేయడం తగదని, వెంటనే ఆ ప్రక్రియను విరమించుకోవాలని ఆయన హెచ్చరించారు. తమ ప్రాంతంలో డేటా సెంటర్లు ఏర్పాటు చేయవద్దంటూ రైతులు న్యాయస్థానాన్ని ఆశ్రయించినప్పటికీ ప్రభుత్వం స్పందించకపోవడం దురదృష్టకరమని విమర్శించారు. డేటా సెంటర్ల నిర్వహణకు అధికంగా నీరు అవసరమయ్యే పరిస్థితుల్లో భవిష్యత్తులో ఈ ప్రాంతం తీవ్రమైన నీటి ఎద్దడిని ఎదుర్కొనే ప్రమాదం ఉందని రమణ ఆందోళన వ్యక్తం చేశారు. ఇప్పటికే పచ్చని పంట పొలాలతో విరాజిల్లుతున్న ఈ ప్రాంతంలో ఇటువంటి ప్రాజెక్టుల వల్ల వ్యవసాయానికి విఘాతం కలగడంతో పాటు పర్యావరణ సమతుల్యత దెబ్బతినే అవకాశం ఉందని పేర్కొన్నారు. రైతుల అభ్యంతరాలను, స్థానిక ప్రజల ఆందోళనలను పరిగణనలోకి తీసుకుని ప్రభుత్వం తక్షణమే తన నిర్ణయాన్ని పునఃసమీక్షించాలని కోరారు. ఈ కార్యక్రమంలో సీపీఎం పార్టీ సభ్యులు బి. సూర్యనారాయణ, ఎన్.వి. రమణ తదితరులు పాల్గొన్నారు.