పాతపట్నం ‘ఉమా సినీ మ్యాక్స్’ పై ఫుడ్ ఇన్‌స్పెక్టర్ దాడులు.
పాతపట్నం నవంబర్ 11,మేజర్ న్యూస్:
అధిక ధరలకు విక్రయాలపై కేసు నమోదు, శాంపిళ్ల సేకరణ.
పాతపట్నం పట్టణంలోని ప్రముఖ సినిమా థియేటర్ ‘ఉమా సినీ మ్యాక్స్’ పై ఆహార భద్రతా శాఖ అధికారులు ఆకస్మిక దాడులు నిర్వహించి విస్తృతంగా తనిఖీలు చేపట్టారు. థియేటర్ ప్రాంగణంలోని క్యాంటీన్‌లో తినుబండారాలు, కూల్ డ్రింక్స్ తదితర ఆహార పదార్థాలను ప్రభుత్వం నిర్ణయించిన ముద్రిత గరిష్ట చిల్లర ధర (ఎమ్మార్పీ) కంటే అధిక ధరకు విక్రయిస్తూ ప్రజలను దోపిడీ చేస్తున్నట్లు తనిఖీల్లో వెల్లడైంది. నిబంధనలను బేఖాతరు చేస్తూ ఎమ్మార్పీ కంటే ఎక్కువ రేట్లకు అమ్ముతున్నట్లు స్వయంగా గుర్తించిన ఫుడ్ ఇన్‌స్పెక్టర్, నిబంధనల ఉల్లంఘనపై తీవ్ర ఆగ్రహం వ్యక్తం చేస్తూ థియేటర్ యాజమాన్యంపై కేసు నమోదు చేశారు. అలాగే నాణ్యతా ప్రమాణాల పరిశీలన కోసం క్యాంటీన్‌లోని పలు ఆహార పదార్థాలను స్వాధీనం చేసుకుని, నిర్దేశిత నిబంధనల ప్రకారం శాంపిళ్లను సేకరించి సమగ్ర విశ్లేషణ కోసం ప్రయోగశాల పరీక్షల నిమిత్తం పంపుతున్నామని అధికారులు స్పష్టం చేశారు. సినిమా వీక్షకుల జేబులు గుల్ల చేస్తూ నాసిరకం లేదా అధిక ధరలతో ఆహార పదార్థాలు విక్రయిస్తే చట్టపరంగా కఠిన చర్యలు తప్పవని ఈ సందర్భంగా హెచ్చరించారు.
