ఓటర్ల జాబితా క్లెయిమ్‌లు, అభ్యంతరాల పరిశీలన గడువు అక్టోబర్ 10 వరకు పొడిగింపు
అనంతపురం బ్యూరో : ఓటర్ల జాబితా ప్రత్యేక సమగ్ర సవరణ (SIR) కార్యక్రమంలో భాగంగా క్లెయిమ్‌లు, అభ్యంతరాల పరిశీలన గడువును అక్టోబర్ 10వ తేదీ వరకు పొడిగించినట్లు జిల్లా కలెక్టర్, జిల్లా ఎన్నికల అధికారి ఓ. ఆనంద్ తెలిపారు. గురువారం ఈ మేరకు ఒక ప్రకటన విడుదల చేశారు. గతంలో అక్టోబర్ 9న ప్రచురించాల్సిన తుది ఓటర్ల జాబితా తేదీని అక్టోబర్ 16కు మారుస్తూ నిర్ణయం తీసుకున్నట్లు వెల్లడించారు.
భారత ఎన్నికల సంఘం సెప్టెంబర్ 29న, రాష్ట్ర ప్రధాన ఎన్నికల అధికారి సెప్టెంబర్ 30న జారీ చేసిన లేఖల మేరకు ఈ మార్పులు చేసినట్లు కలెక్టర్ పేర్కొన్నారు. ఓటర్ల జాబితా సవరణ ప్రక్రియలో అర్హులైన ఓటర్లకు న్యాయం జరిగేలా, క్లెయిమ్‌లు, అభ్యంతరాలను క్షుణ్ణంగా పరిశీలించాలని సంబంధిత అధికారులకు సూచించారు.
నోటీసులకు స్పందించని వారి ఇళ్ల వద్దకే వెళ్లి విచారణ
ఓటర్ల జాబితా పరిశీలనలో భాగంగా నోటీసులు అందుకున్నప్పటికీ విచారణకు హాజరుకాని వ్యక్తుల నివాసాలకు బూత్‌ స్థాయి అధికారులు (బీఎల్‌వోలు) స్వయంగా వెళ్లి విచారణ చేపట్టాలని ఆదేశాలు జారీ చేసినట్లు తెలిపారు. ప్రత్యేక పరిస్థితుల్లో మాత్రమే ఆన్‌లైన్‌ ద్వారా విచారణ నిర్వహించాలని పేర్కొన్నారు. సంబంధిత వ్యక్తుల బంధువులు అందుబాటులో ఉండి, సరైన ధ్రువీకరణ పత్రాలు సమర్పిస్తే వాటిని కూడా స్వీకరించవచ్చని స్పష్టం చేశారు.
అట్టడుగు వర్గాల ప్రాంతాల్లో ప్రత్యేక శిబిరాలు
ఓటర్ల జాబితా సవరణ ప్రక్రియలో ఎవరూ ఓటు హక్కుకు దూరం కాకుండా ప్రత్యేక చర్యలు చేపట్టాలని ఎన్నికల సంఘం సూచించింది. ఇందులో భాగంగా రాత్రి బస కేంద్రాలు, కార్మిక శిబిరాలు, నిరుపేదల బస్తీలు, నిరాశ్రయులు నివసించే ప్రాంతాల్లో ప్రత్యేక శిబిరాలు నిర్వహించాలి. బస్‌ షెల్టర్లు, ఫుట్‌పాత్‌లు, రైల్వే స్టేషన్లు, నగరాల్లోని ప్రధాన కూడళ్ల వద్ద నివసించే నిరాశ్రయులను గుర్తించి, వారికి ఓటరు నమోదు ప్రక్రియపై అవగాహన కల్పించాలి. ముఖ్యంగా ప్రత్యేకించి వెనుకబడిన గిరిజన సమూహాల (PVTGs) నివాస ప్రాంతాల్లోనూ ప్రత్యేక శిబిరాలు నిర్వహించాలని ఆదేశించినట్లు కలెక్టర్ వివరించారు.
కొత్త ఓటర్ల నమోదుకు ప్రత్యేక డ్రైవ్‌లు
ఓటర్ల జాబితా నిరంతర సవరణ ప్రక్రియలో భాగంగా ఇప్పటివరకు పేర్లు నమోదు చేసుకోని అర్హులైన వ్యక్తులు, జాబితాలో పేర్లు నమోదు కాకుండా మిగిలిపోయిన ఓటర్లు, తొలిసారిగా ఓటు హక్కు పొందిన యువతను గుర్తించి నమోదు చేయడానికి ప్రత్యేక డ్రైవ్‌లు చేపట్టాలని సూచించారు. అర్హులైన ప్రతి ఒక్కరి పేరు ఓటర్ల జాబితాలో ఉండేలా సంబంధిత అధికారులు చర్యలు తీసుకోవాలని పేర్కొన్నారు.
అదేవిధంగా, డిక్లరేషన్‌ ఫారం అనేది ప్రత్యేక సమగ్ర సవరణ (SIR) వ్యవధికి మాత్రమే వర్తిస్తుందని, సాధారణ సవరణ కాని కాలంలో (Non-SIR) డిక్లరేషన్‌ లేకుండానే ప్రక్రియ కొనసాగుతుందని ఎన్నికల సంఘం మార్గదర్శకాల్లో పేర్కొన్నట్లు తెలిపారు.
23,439 మందిపై మరోసారి క్షేత్రస్థాయి పరిశీలన
అనంతపురం జిల్లాలో విచారణ దశలో ప్రస్తుతం అనర్హులుగా గుర్తించిన 23,439 మంది ఓటర్లకు సంబంధించి మరోసారి క్షేత్రస్థాయిలో పునఃపరిశీలన (రీ-వెరిఫికేషన్‌) నిర్వహించాలని కలెక్టర్ తెలిపారు. ఈ పరిశీలనలో అర్హులుగా తేలిన వారి పేర్లను ఓటర్ల జాబితాలో చేర్చేందుకు అవసరమైన చర్యలు తీసుకోవాలని సూచించారు.
ఓటర్ల జాబితా సవరణ ప్రక్రియ పారదర్శకంగా, నిబంధనలకు అనుగుణంగా జరగాలని, అర్హులైన ఓటర్ల పేర్లు తొలగిపోకుండా, అనర్హుల నమోదు జరగకుండా అధికారులు అప్రమత్తంగా వ్యవహరించాలని పేర్కొన్నారు.
