నిర్దేశిత గడువులో అర్జీలకు పరిష్కారం చూపాలి
నిర్దేశిత గడువులో అర్జీలకు పరిష్కారం చూపాలి - జాయింట్ కలెక్టర్ కల్పనా కుమారి - కలెక్టరేట్ "మీకోసం"లో 307 అర్జీలు సూర్య ఒంగోలు, బ్యూరో :
ప్రకాశం జిల్లా కలెక్టరేట్లోని PGRS హాల్లో సోమవారం నిర్వహించిన ‘ప్రజా సమస్యల పరిష్కార వేదిక’ కార్యక్రమంలో జిల్లా జాయింట్ కలెక్టర్ కల్పనా కుమారి పాల్గొని, వివిధ ప్రాంతాల నుండి వచ్చిన ప్రజల నుండి వినతులు అర్జీలను నేరుగా స్వీకరించారు. జిల్లా వ్యాప్తంగా తమ సమస్యలను విన్నవించుకోవడానికి వచ్చిన బాధితుల నుండి ఈ రోజు మొత్తం 307 అర్జీలు నమోదయ్యాయి. జాయింట్ కలెక్టర్ ప్రతి ఒక్కరి సమస్యను ఓపిగ్గా విని, వాటి తక్షణ పరిష్కారం కోసం సంబంధించిన విభాగాధిపతులకు మార్గదర్శనం చేశారు. అర్జీల స్వీకరణ అనంతరం అధికారులతో నిర్వహించిన సమీక్షా సమావేశంలో జాయింట్ కలెక్టర్ అధికారులకు పలు కీలక సూచనలు, స్పష్టమైన ఆదేశాలు జారీ చేశారు. PGRS ద్వారా ప్రజల నుండి వచ్చే ప్రతి అర్జీ అత్యంత కీలకమైనదని, అధికారులు వాటిపై ప్రత్యేక దృష్టి సారించి నిర్దేశిత కాలపరిమితిలోగా పూర్తి స్థాయిలో పరిష్కారం చూపాలని తేల్చి చెప్పారు. అర్జీలను పరిష్కరించడంలో నాణ్యతా ప్రమాణాలు పాటించాలని, అర్జీదారుడు పూర్తి సంతృప్తి చెందేలా క్షేత్రస్థాయి పరిశీలన పక్కాగా జరగాలని ఆదేశించారు. అధికారుల నిర్లక్ష్యం కారణంగా ఒకే సమస్యపై ప్రజలు పదేపదే కలెక్టరేట్ చుట్టూ తిరిగే పరిస్థితి రాకూడదని, పునరావృతమయ్యే (రీ-ఓపెన్) అర్జీల పట్ల కఠినంగా వ్యవహరిస్తామని హెచ్చరించారు. ముఖ్యంగా భూసంబంధిత, రెవెన్యూ ఇతర శాఖల మధ్య నలిగిపోయే సమస్యలలో విభాగాలు పరస్పర సమన్వయంతో వ్యవహరించి వేగవంతంగా బాధితులకు న్యాయం చేయాలని దిశానిర్దేశం చేశారు. ఈ ప్రజా పరిష్కార వేదిక కార్యక్రమంలో జిల్లా స్థాయి అధికారులు కలెక్టరేట్ సిబ్బంది పాల్గొన్నారు.
