నేడే తేలనున్న అభ్యర్థుల భవితవ్యం

కొత్తవలస, సూర్య :  ఇటీవల నిర్వహించిన స్థానిక సంస్థల ఎంపీటీసీ, జడ్పీటీసీ ఎన్నికలకు సంబంధించి నేడుశనివారం శృంగవరపుకోట పట్టణంలోని ఓ ప్రైవేట్ కళాశాలలో ఓట్ల లెక్కింపు జరగనుంది. దీంతో అభ్యర్థుల భవితవ్యం మరికొద్ది గంటల్లో తేలనుంది. ఎన్నికల ప్రచారం నుంచి పోలింగ్ వరకు ఎంతో ఉత్సాహంగా సాగిన రాజకీయ పోరుకు నేడు ఫలితం వెలువడనుంది. ఓట్ల లెక్కింపు నేపథ్యంలో అభ్యర్థులు, వారి అనుచరుల్లో తీవ్ర ఉత్కంఠ నెలకొంది. గెలుపుపై ఎవరికి వారు ధీమా వ్యక్తం చేస్తుండగా, ఓటర్ల తీర్పు ఎవరికి అనుకూలంగా ఉంటుందోనని రాజకీయ వర్గాల్లో ఆసక్తి నెలకొంది. ఎన్నికల ఫలితాల కోసం అభ్యర్థులు, నాయకులు, కార్యకర్తలు ఉత్కంఠగా ఎదురుచూస్తున్నారు. తమ అభ్యర్థి విజయం సాధిస్తారనే ఆశతో అనుచరులు లెక్కలు వేసుకుంటూ ఊహల పల్లకిలో విహరిస్తున్నారు. నేటి ఓట్ల లెక్కింపుతో ఎవరి అంచనాలు నిజమవుతాయో, ఎవరి ఆశలు నెరవేరుతాయో తేలిపోనుంది.