నలుగురు సజీవ దహనం

 విజయవాడ, సూర్య ప్రతినిధి :విజయవాడ బైపాస్ రోడ్డులో ఆదివారం అర్ధరాత్రి తీవ్ర విషాదం చోటుచేసుకుంది. వేగంగా దూసుకొచ్చిన ఓ ఎలక్ట్రిక్ కారు (EV) అదుపుతప్పి రోడ్డు పక్కన ఉన్న రెయిలింగ్‌ను తీవ్రంగా ఢీకొట్టింది.

ప్రమాదం జరిగిన వెంటనే కారులో ఒక్కసారిగా మంటలు చెలరేగి, క్షణాల వ్యవధిలో వాహనం పూర్తిగా దగ్ధమైంది. ఈ ఘోర ప్రమాదంలో కారులో ప్రయాణిస్తున్న నలుగురు వ్యక్తులు సజీవ దహనమయ్యారు. మృతదేహాలు గుర్తించలేనంతగా కాలిపోయాయి.

ఈ ప్రమాదంలో తీవ్రంగా గాయపడిన మరో వ్యక్తి పరిస్థితి అత్యంత విషమంగా ఉంది. గమనించిన స్థానికులు, పోలీసులు వెంటనే స్పందించి క్షతగాత్రుడిని చికిత్స నిమిత్తం సమీపంలోని ఆస్పత్రికి తరలించారు.

ప్రమాదానికి అతివేగమే కారణమా లేక ఈవీ బ్యాటరీలో సాంకేతిక లోపం తలెత్తిందా అనే కోణంలో పోలీసులు కేసు నమోదు చేసి దర్యాప్తు చేస్తున్నారు. పూర్తి వివరాలు తెలియాల్సి ఉంది.