నామినేషన్ల స్వీకరణ పారదర్శకంగా జరగాలి: కలెక్టర్
మచిలీపట్నం, మేజర్ న్యూస్: రెండవ సాధారణ స్థానిక సంస్థల ఎన్నికలు–2026లో భాగంగా నామినేషన్ల స్వీకరణ ప్రక్రియను ఎన్నికల సంఘం నిబంధనల ప్రకారం, పూర్తి పారదర్శకంగా నిర్వహించాలని జిల్లా కలెక్టర్ డీకే బాలాజీ అధికారులను ఆదేశించారు. శనివారం బందరు మండలం పోతెపల్లి గ్రామ పంచాయతీ కార్యాలయంలో ఏర్పాటు చేసిన నామినేషన్ స్వీకరణ కేంద్రాన్ని ఆయన సందర్శించి పరిశీలించారు. ఈ సందర్భంగా నామినేషన్ల స్వీకరణకు చేసిన ఏర్పాట్లు, అభ్యర్థులకు కల్పించిన సదుపాయాలు, నామినేషన్ పత్రాల పరిశీలన, అవసరమైన రికార్డుల నిర్వహణ తదితర అంశాలను క్షేత్రస్థాయిలో తనిఖీ చేశారు. ఎన్నికల సంఘం మార్గదర్శకాలు, నిబంధనలను ఖచ్చితంగా పాటిస్తూ అభ్యర్థుల నుంచి నామినేషన్లను నిర్ణీత విధానంలో స్వీకరించాలని సూచించారు. ప్రతి నామినేషన్ దరఖాస్తును క్షుణ్ణంగా పరిశీలించి, అవసరమైన పత్రాలు సక్రమంగా ఉన్నాయో లేదో నిర్ధారించుకోవాలని తెలిపారు. ఎన్నికల ప్రక్రియలో ఎలాంటి పొరపాట్లకు తావులేకుండా నిష్పక్షపాతంగా విధులు నిర్వహించాలని, నామినేషన్లు దాఖలు చేసేందుకు వచ్చే అభ్యర్థులకు అవసరమైన సమాచారం, సహకారం అందించి ప్రక్రియ సజావుగా జరిగేలా చూడాలని అధికారులకు కలెక్టర్ సూచించారు.
స్టాఫ్ రిపోర్టర్: ✍️ ప్రేమ్ రాజ్, మచిలీపట్నం, కృష్ణాజిల్లా.