మురసుతుఫాన్ ఎఫెక్ట్ నరసరావుపేటలోముందస్తు భద్రతా చర్యలు

నరసరావుపేట న్యూస్ : మురసుతుఫాన్ ప్రభావం నేపథ్యంలో నరసరావుపేటలో అధికారులు అప్రమత్త మయ్యారు. ఇందులో భాగంగా సోమవారం చంద్రబాబు నాయుడు కాలనీలో ఆర్డీవో బాలకృష్ణ పర్యటించి క్షేత్రస్థాయిలో పరిస్థితులను పరిశీలించారు. కాలనీ సమీపంలోని వాగు తుఫాన్ ప్రభావంతో ఉప్పొంగి ప్రవహించే అవకాశం ఉండటంతో వాగు పరిసర ప్రాంతాలను పరిశీలించారు. వాగు సమీపంలోని గుడిసెల్లో నివసిస్తున్న ప్రజలను కలిసి తుఫాన్ కారణంగా ఎదురయ్యే ప్రమాదాలపై అవగాహన కల్పించారు. ముందస్తు భద్రతా చర్యల్లో భాగంగా అధికారులు సూచించిన వెంటనే ప్రజలు సురక్షిత ప్రాంతాలకు తరలివెళ్లేందుకు సిద్ధంగా ఉండాలని సూచించారు. ప్రజల భద్రతకు ప్రాధాన్యతనిస్తూ అప్రమత్తంగా ఉండాలని ఆర్డీవో కోరారు.