మున్సిపల్, పంచాయతీ ఎన్నికల నిర్వహణకు అధికారులు ముందస్తు సన్నద్ధతతో ఉండాలి

అనకాపల్లి ప్రధాన ప్రతినిధి;మున్సిపల్, పంచాయతీ ఎన్నికల నోటిఫికేషన్ వెలువడనున్న నేపథ్యంలో ఎన్నికల నిర్వహణకు అవసరమైన ముందస్తు ఏర్పాట్లు, అధికారుల సన్నద్ధతపై జిల్లా కలెక్టర్ విజయ కృష్ణన్ సంబంధిత అధికారులతో  శనివారం   సమీక్ష సమావేశం నిర్వహించారు.
ఈ సందర్భంగా జిల్లా కలెక్టర్ మాట్లాడుతూ, ఎంపీడీవోలు, తహసీల్దార్లు, పోలీసు అధికారులు సమన్వయంతో స్ట్రాంగ్ రూమ్‌లను పరిశీలించి, అవి అన్ని విధాలా సక్రమంగా ఉన్నాయో లేదో తనిఖీ చేయాలని సూచించారు. ఎక్కడైనా మరమ్మతులు అవసరమైతే వెంటనే పూర్తి చేయించాలని ఆదేశించారు.
ఎన్నికల విధులు నిర్వహించే అధికారులు రిజర్వేషన్ నిబంధనలపై పూర్తి అవగాహన కలిగి ఉండాలని, ప్రతి అంశంపై స్పష్టతతో వ్యవహరించాలని తెలిపారు. రిజర్వేషన్ల ప్రక్రియను నిబంధనలకు అనుగుణంగా ఎలాంటి పొరపాట్లకు తావులేకుండా పక్కాగా నిర్వహించాలని స్పష్టం చేశారు.
అధికారులు వ్యక్తిగతంగా పోలింగ్ కేంద్రాలను సందర్శించి, అక్కడ ఉన్న సమస్యలను గుర్తించి, వాటిని వెంటనే పరిష్కరించేలా చర్యలు తీసుకోవాలని కలెక్టర్ సూచించారు. పోలింగ్ కేంద్రాలకు వెళ్లే మార్గాలను ఖరారు చేసే సమయంలో రహదారులపై గుంతలు ఉన్నా, రహదారులు ఇరుకుగా ఉండి రాకపోకలకు ఇబ్బందులు ఎదురైనా ఆ విషయాన్ని తన దృష్టికి తీసుకురావాలని, వాటిని వెంటనే మరమ్మతులు చేయించి రహదారులను మెరుగుపరిచేలా చర్యలు తీసుకుంటామని తెలిపారు.ఎన్నికల నిర్వహణలో సంబంధిత శాఖల అధికారులు పరస్పర సమన్వయంతో పనిచేస్తూ, అప్పగించిన బాధ్యతలను సమర్థవంతంగా నిర్వర్తించాలని జిల్లా కలెక్టర్ సూచించారు.ఈ సమీక్ష సమావేశంలో ఎస్పీ తుహిన్ సిన్హా, జాయింట్ కలెక్టర్ శౌర్య మాన్ పటేల్, జిల్లా రెవెన్యూ అధికారి వై .సత్యనారాయణ రావు,  ఆర్డీవోలు, జిల్లా పరిషత్ సీఈవో, డిప్యూటీ సీఈవో, ఎంపీడీవోలు, తహసీల్దార్లు, పోలీసు అధికారులు, సంబంధిత శాఖల అధికారులు పాల్గొన్నారు.
 

రవి కుమార్ అనకాపల్లి