మిట్స్లో ఏజెంటిక్ ఏఐ ఆచరణాత్మక వినియోగంపై అవగాహన సదస్సు : హాజరైన బ్లూ యాండర్ ఇండియా ప్రాజెక్ట్ డైరెక్టర్ శ్రీనివాస్ కేదారిశెట్టి
కురబలకోట,మేజర్ న్యూస్ : మదనపల్లి సమీపంలో గల (మదనపల్లె ఇన్స్టిట్యూట్ ఆఫ్ టెక్నాలజీ అండ్ సైన్స్) మిట్స్ డీమ్డ్ టు బి యూనివర్సిటీలోని కంప్యూటర్ సైన్స్ అండ్ ఇంజినీరింగ్ విభాగం ఆధ్వర్యంలో విద్యార్థులకు ఏజెంటిక్ ఏఐ - ఆచరణాత్మక వినియోగాలు అనువర్తనాలు అనే అంశంపై మంగళవారం ఒకరోజు సెమినార్ కార్యక్రమాన్ని నిర్వహించారు.ఈ కార్యక్రమానికి ముఖ్య అతిథిగా బెంగళూరులోని బ్లూ యాండర్ ఇండియా ప్రైవేట్ లిమిటెడ్,ప్రాజెక్ట్ డైరెక్టర్ శ్రీనివాస్ కేదారిశెట్టి హాజరయ్యారు.ఈ సందర్భంగా ఆయన మాట్లాడుతూ ప్రస్తుత సాంకేతిక ప్రపంచంలో కృత్రిమ మేధస్సు వేగంగా అభివృద్ధి చెందుతోందని,ముఖ్యంగా ఏజెంటిక్ ఏఐ భవిష్యత్తులో అనేక రంగాల్లో విప్లవాత్మక మార్పులు తీసుకురానుందన్నారు.సాధారణ చాట్బాట్లకు,ఏజెంటిక్ ఏఐకి మధ్య ఉన్న వ్యత్యాసాలను వివరిస్తూ,ఏఐ ఏజెంట్లు స్వయంగా పరిస్థితులను విశ్లేషించడం,లక్ష్యాలను అర్థం చేసుకోవడం,ప్రణాళికలు రూపొందించడం,వివిధ సాంకేతిక సాధనాలు మరియు ఏపీఐల సహాయంతో పనులను పూర్తి చేయడం వంటి సామర్థ్యాలను కలిగి ఉంటాయని తెలిపారు.ఏజెంటిక్ ఏఐ లోని లార్జ్ లాంగ్వేజ్ మోడల్స్,మెమరీ,కాంటెక్స్ట్,ప్లానింగ్,భద్రతా నియంత్రణలు,మానవ పర్యవేక్షణ వంటి అంశాల ప్రాధాన్యతను తెలియజేశారు.ముఖ్యంగా సరఫరా గొలుసు నిర్వహణ,వ్యాపార కార్యకలాపాలు,పరిశ్రమల ఆటోమేషన్,తక్షణ వ్యాపార నిర్ణయాలు తీసుకోవడంలో ఏజెంటిక్ ఏఐ వినియోగాన్ని వాస్తవ ఉదాహరణలతో వివరించారు.విద్యార్థులు ప్రోగ్రామింగ్,సమస్య పరిష్కార నైపుణ్యాలు,ఏఐ టూల్స్ వినియోగం,ప్రాజెక్టులపై పట్టు సాధించడం ద్వారా భవిష్యత్తులో ఉన్నతస్థాయి ఉద్యోగ అవకాశాలను అందిపుచ్చుకోవచ్చని తెలిపారు.ఏఐ ఆధారిత వ్యవస్థల అభివృద్ధిలో డేటా నాణ్యత,విశ్వసనీయత,వ్యయ నియంత్రణ,సైబర్ భద్రత,జవాబుదారీతనం వంటి అంశాలపై ప్రత్యేక దృష్టి సారించాలని తెలిపారు.ఏఐ,మెషిన్ లెర్నింగ్,డేటా సైన్స్,ఏఐ ఏజెంట్ డెవలప్మెంట్,సాఫ్ట్వేర్ ఆటోమేషన్,క్లౌడ్ కంప్యూటింగ్ వంటి రంగాల్లో విస్తృతమైన ఉద్యోగ అవకాశాలు అందుబాటులో ఉన్నాయని తెలిపారు.అనంతరం ప్రిన్సిపాల్ డాక్టర్ పి.రామనాథన్ మాట్లాడుతూ ప్రస్తుత సాంకేతిక యుగంలో మారుతున్న సాంకేతిక పరిణామాలకు అనుగుణంగా నిరంతరం కొత్త నైపుణ్యాలను నేర్చుకుంటూ,ఆచరణాత్మక నైపుణ్యాలు,పరిశ్రమలకు అవసరమైన సామర్థ్యాలను పెంపొందించుకోవాలని తెలిపారు.ఆధునిక సాంకేతికతపై అవగాహన,సృజనాత్మక ఆలోచన,సమస్య పరిష్కార నైపుణ్యాలు కలిగిన విద్యార్థులకు ప్రముఖ ఐటీ సంస్థలు,సాఫ్ట్వేర్ కంపెనీలు,స్టార్టప్లు,పరిశోధనా సంస్థల్లో మంచి ఉద్యోగ అవకాశాలు లభిస్తాయని తెలిపారు.ఈ కార్యక్రమంలో ప్రిన్సిపాల్ డాక్టర్ పి.రామనాథన్,విభాగాధిపతి డాక్టర్ ఎం.శ్రీదేవి,కో-ఆర్డినేటర్స్ డాక్టర్ కే.కృష్ణయ్య,డాక్టర్ ఆస్పిన్ పబి,అధ్యాపకులు,విద్యార్థులు పాల్గొన్నారు.
రిపోర్టర్ : కె.ఈశ్వర్ రెడ్డి,మదనపల్లి నియోజకవర్గం ఇంచార్జి