పోలీస్ అమరుల త్యాగాలు చిరస్మరణీయం: వారికి అండగా నిలవడం మనందరి కర్తవ్యం.. మంత్రి నారా లోకేష్!
సూర్య బ్యూరో, అమరావతి: దేశ రక్షణ, సమాజ భద్రత కోసం తమ ప్రాణాలను సైతం లెక్కచేయకుండా అర్పించిన పోలీస్ అమరుల త్యాగాలు వెలకట్టలేనివని రాష్ట్ర విద్య, ఐటీ శాఖ మంత్రి నారా లోకేష్ పేర్కొన్నారు. పోలీసు అమరవీరుల సంస్మరణ దినోత్సవం సందర్భంగా విధి నిర్వహణలో ప్రాణత్యాగం చేసిన పోలీస్ వీరులకు ఆయన ఘనంగా నివాళులర్పించి, వారి పవిత్ర స్మృతికి జోహార్లు ప్రకటించారు.
పోలీసుల త్యాగాలను స్మరించుకోవడం మనందరి కర్తవ్యం:
శాంతిభద్రతల పరిరక్షణ కోసం రాత్రింబవళ్లు శ్రమిస్తూ, ఎన్నో వ్యయప్రయాసలు, కుటుంబ త్యాగాల నడుమ బాధ్యతలను నిర్వర్తించే పోలీసులను ప్రతి ఒక్కరూ గౌరవించాలని మంత్రి లోకేష్ పిలుపునిచ్చారు. విధి నిర్వహణలో వారు చూపే అంకితభావం సమాజానికి నిత్య స్ఫూర్తిదాయకమని అన్నారు. దేశ సమగ్రత, పౌరుల ప్రాణ, ఆస్తి రక్షణ కోసం ప్రాణాలర్పించిన అమరుల కుటుంబాలకు సమాజం ఎల్లప్పుడూ రుణపడి ఉంటుందని గుర్తుచేశారు.
పోలీసులకు అన్ని విధాలా అండగా నిలుస్తాం:
సమాజ రక్షణ కోసం ముందువరుసలో నిలబడి పోరాడుతున్న పోలీసు సిబ్బందికి అన్ని వేళలా అండగా నిలవాల్సిన బాధ్యత మనందరిపై ఉందని లోకేష్ స్పష్టం చేశారు. వారి సంక్షేమానికి, విధి నిర్వహణలో ఎదురయ్యే సవాళ్లను సమర్థవంతంగా ఎదుర్కొనేందుకు అవసరమైన సహాయ సహకారాలు అందించడానికి ప్రభుత్వం కట్టుబడి ఉందని తెలిపారు. పోలీసు అమరవీరుల ఆశయాలకు అనుగుణంగా, నేర రహిత సమాజాన్ని నిర్మించేందుకు ప్రజలు సైతం పోలీసు వ్యవస్థకు సహకరించాలని ఆయన కోరారు.
