మహిళా ఆరోగ్య సంరక్షణలో కృత్రిమమేధపై గీతంలో వర్క్‌షాప్
విశాఖ ఎడ్యుకేషన్, అక్టోబర్ 6 మేజర్ న్యూస్ : గీతం డీమ్డ్ విశ్వవిద్యాలయంలోని కంప్యూటర్ సైన్స్ అండ్ సిస్టమ్స్ ఇంజనీరింగ్ విభాగం ఆధ్వర్యంలో “మహిళా ఆరోగ్య సంరక్షణలో ఆర్టిఫిషియల్ ఇంటలిజెన్స్(ఎఐ)మరియు క్లినికల్ ట్రాన్స్‌లేషనల్ రీసెర్చ్ అనుసంధానం” అనే అంశం పై అక్టోబర్ 26 నుండి 30 వరకు ఐదు రోజుల జాతీయ స్థాయి వర్క్‌షాప్ నిర్వహిస్తున్నట్లు నిర్వాహక కార్యదర్శి డాక్టర్ కె.నిట్టల లక్ష్మేశ్వర రావు తెలిపారు. భారత ప్రభుత్వ ఆరోగ్య పరిశోధనా విభాగం (డిహెచఆర్), కేంద్ర ఆరోగ్య మరియు కుటుంబ సంక్షేమ మంత్రిత్వ శాఖ సౌజన్యంతో ఈ సదస్సు ఉచితంగా నిర్వహించబడుతోందని ఆయన పేర్కొన్నారు. ఈ వర్క్‌షాప్‌లో రొమ్ము, గర్బాశయ క్యాన్సర్ల ముందస్తు గుర్తింపు, ఎఐ ఆధారిత వైద్య పరికరాలు, డిజిటల్ హెల్త్ టెక్నాలజీస్ మరియు మాతా శిశు ఆరోగ్య డేటా విశ్లేషణ వంటి పలు కీలక అంశాలపై ప్రముఖ నిపుణులు ప్రసంగిస్తారని ఆయన తెలిపారు. కళాశాలల అధ్యాపకులు, పరిశోధకులు, వైద్యులు, పిజి విద్యార్ధులు మరియు సాంకేతిక నిపుణులు ఈ అవకాశాన్ని ఉపయోగించుకోవచ్చునని ఆయన సూచించారు.
