మద్యం తాగి వాహనం నడిపిన వ్యక్తికి రూ.6 వేల జరిమానా

మద్యం సేవించి వాహనం నడుపుతూ పోలీసులకు పట్టుబడిన వ్యక్తికి న్యాయస్థానం రూ.6 వేల జరిమానా విధించింది. వివరాల్లోకి వెళితే.. ఈ నెల 18న దుర్గి పోలీస్ స్టేషన్ పరిధిలో పోలీసులు నిర్వహించిన డ్రంక్ అండ్ డ్రైవ్ తనిఖీల్లో మాచర్ల పట్టణానికి చెందిన కోటా వినోద్ మద్యం సేవించి వాహనం నడుపుతూ పట్టుబడ్డాడు. దీంతో అతనిపై పోలీసులు కేసు నమోదు చేసి న్యాయస్థానంలో హాజరుపరిచారు. ఈ కేసును విచారించిన రెండవ తరగతి ప్రత్యేక మేజిస్ట్రేట్ కోర్టు నిందితుడికి రూ.6,000 జరిమానా విధిస్తూ తీర్పునిచ్చింది. ఈ సందర్భంగా దుర్గి ఎస్‌ఐ బి. గోపాల్ మాట్లాడుతూ.. మద్యం సేవించి వాహనాలు నడపడం చట్టరీత్యా నేరమని, దీనివల్ల రోడ్డు ప్రమాదాలు జరిగి విలువైన ప్రాణాలు కోల్పోయే ప్రమాదం ఉందని తెలిపారు.ప్రతి వాహనదారుడు ట్రాఫిక్ నిబంధనలు పాటించాలని, తమ ప్రాణాలతో పాటు ఇతరుల ప్రాణాలకు ముప్పు కలిగించకూడదని సూచించారు. దుర్గి పోలీస్ స్టేషన్ పరిధిలో డ్రంక్ అండ్ డ్రైవ్ తనిఖీలు నిరంతరం కొనసాగుతాయని, మద్యం సేవించి వాహనాలు నడిపేవారిపై చట్టప్రకారం కఠిన చర్యలు తీసుకుంటామని హెచ్చరించారు.

పేర్ల వెంకటేశ్వర్లు సీనియర్ రిపోర్టర్ దుర్గి