లా అండ్ ఆర్డర్‌కు భంగం కలిగిస్తే కఠిన చర్యలు పలమనేరు పట్టణంలో 350 మంది పోలీసు, పారా మిలటరీ బలగాలతో భారీ కవాతు
పలమనేరు మేజర్ న్యూస్ సుమారు 350 మంది పోలీసు, బెటాలియన్, పారా మిలటరీ సిబ్బంది పాల్గొన్న ఈ కవాతు పట్టణంలోని ప్రధాన వీధుల గుండా సాగింది. ఈ సందర్భంగా పలమనేరు డీఎస్పీ డేగల ప్రభాకర్ మాట్లాడుతూ ఎన్నికల సమయంలో శాంతిభద్రతలకు విఘాతం కలిగించేలా వ్యవహరించే వారిపై కఠిన చర్యలు తీసుకుంటామని హెచ్చరించారు. ఎలాంటి అవాంఛనీయ సంఘటనలకు అవకాశం లేకుండా పోలీసు శాఖ పటిష్టమైన భద్రతా ఏర్పాట్లు చేపట్టిందని తెలిపారు.రాజకీయ పార్టీల నాయకులు, కార్యకర్తలు ఎన్నికల నియమావళిని తప్పనిసరిగా పాటించాలని, ప్రజలు ప్రశాంత వాతావరణంలో తమ ఓటు హక్కును వినియోగించుకునేలా సహకరించాలని కోరారు. ఎన్నికల ప్రక్రియకు ఆటంకం కలిగించినా, ప్రజాశాంతికి భంగం కలిగించినా చట్టపరంగా చర్యలు తప్పవని స్పష్టం చేశారు.ఈ కవాతులో పలమనేరు అర్బన్ సీఐ మోహన్ రెడ్డి, గంగవరం సీఐ రామ్ గోపాల్, పలమనేరు రూరల్ సీఐ పరుశురామ్, వి.కోట సీఐ సోమశేఖర్ రెడ్డి, ఎస్సైలు స్వర్ణ తేజ, చందన ప్రియతో పాటు పలువురు పోలీసు అధికారులు, సిబ్బంది పాల్గొన్నారు.
రిపోర్టర్ అనిల్ కుమార్ యాదవ్
