క్వారీ నిర్వాహకుడు ఆత్మహత్య

క్వారీ నిర్వాహకుడు ఆత్మహత్య

మదనపల్లె టౌన్: మదనపల్లె మండలం వలసపల్లి పంచాయతీ పరిధిలోని కనుమలో విషాద ఘటన చోటుచేసుకుంది. హర్యానాకు చెందిన క్వారీ నిర్వాహకుడు మణిపాల్ యాదవ్ (43) సోమవారం సాయంత్రం అద్దె ఇంట్లో ఆత్మహత్యకు పాల్పడ్డాడు.

గంగమ్మ గుడి ఎదురుగా ఉన్న అద్దె ఇంట్లో నివాసం ఉంటున్న మణిపాల్ యాదవ్ ఇంటి బెడ్‌రూమ్‌లో ఫ్యాన్‌కు ఉరి వేసుకున్నట్లు సమాచారం. సాయంత్రం సుమారు 6.30 గంటల సమయంలో స్థానికులు ఈ విషయాన్ని గుర్తించి మదనపల్లె తాలూకా పోలీసులకు సమాచారం అందించారు.

సమాచారం అందుకున్న తాలూకా పోలీసులు ఘటనాస్థలికి చేరుకుని పరిశీలించారు. అనంతరం మృతదేహాన్ని పోస్టుమార్టం నిమిత్తం మదనపల్లె ప్రభుత్వ ఆసుపత్రికి తరలించారు.

మణిపాల్ యాదవ్ ఆత్మహత్యకు గల కారణాలు తెలియాల్సి ఉంది. ఘటనపై తాలూకా పోలీసులు కేసు నమోదు చేసి దర్యాప్తు చేస్తున్నారు.